MSU hruaitute thubuai tihtawp loh chuan Chakma House hawn an remti dawn lo

Mizo Students Union (MSU) leh Aizawl City College Joint Students Union (ACCJSU) hruai­tute chuan nimin khan Aizawl Press Club-ah thuthar thehdarhtute an kâwm a; MSU hruaitute thubuai tihtawp a nih loh chuan vawiin aṭangin Chakma House hawn an remtih dawn loh thu an sawi.

MSU president Vanlalliana Khiangte chuan, September 26, 2017-a Chawngte khua higher secondary school-a Mizo zirlai inkhel mekte Chakma-te'n kut an thlak vanga Mizo zirlaite thlavâng MSU-in a hauhna lama thil thlenga sorkarin MSU hruai­tute court case an siamsak leh zirlai hruaitute'n zirlaite tana hma an lakna kawnga thubuai siamsak an ni fo chu ṭha lo an tih thu a sawi a, "Chakma case chungchang mai bakah, National Institute of Technology (NIT)-a zirlaite thlavâng hauhnaa MSU-in hma a laknaah pawh case siamsak kan ni," a ti.

September 26, 2017-ah Chawngte HSS zirlaite inkhel chu Chakma-te'n field-ah an tibuai a, kut an thlak nia sawiin Vanlalliana chuan, "MSU-in a hriat veleh hian Chakma House-a Liasion Officer chu thil awmzia zawhfiah tumin a office-ah lên chilh nghal a ni a, sawifiah tur a hriat loh avangin Chakma House chu mikhual thleng rih lo se a 

ṭhat zawk tur thu hrilh a ni," a ti a; September 28, 2017-ah Vanapa Hall aṭanga Chakma House thlengin Mizo zirlaite thlavang hauhna kawngzawh huaihawt a nih thu a sawi.

MSU President chuan, MSU hruaitute Chakma House-a an kal chungchangah LO chuan Vaivakawn Police Station-ah FIR a thehlut tih sawiin, "MSU hruaitute hian thiam lohna kan neih lohzia lantir nan leh khatih laia Aizawl SP ngenna angin Vaivakawn PS-ah khatih laia MSU office bearer paruk chu an inpe a ni. Thil sual tih a awm loh avangin case pawh a fel mai tur thu Aizawl SP-in MSU min hrilh a ni," a ti.

Vanlalliana Khiangte chuan, buaina kal zelah khatih laia minister C Ngunlianchunga pisaah MSU leh Chakma hruaitu ṭhenkhatte an inkawm thu sawiin, "Hetiang buaina hi a thlen tawh loh nan leh buaina pawh a tàwp theih nan hmalak ni se tih sawiho a ni. Chakma House LO-in FIR a hnûkkîr lo leh titawp loa vawiin thlenga case kalpui a ni hi kan hrethiam lo tak zet," a ti a; MSU hruaitute thubuai court-a kal mek chu tihtawp a nih theih nan hma la nghal tura sorkar an ngen thu a sawi.

Zawhna chhangin MSU hruai­tute chuan, NIT-Mizoram vanga thubuai an neih chung­changah nimin khan NIT Director an biak thu an sawi a, "Thil thlen laia director a nih loh avangin FIR chungchang a lo hre ve lo a, FIR hnuhkir a nih theih nan hma a lak tur thu a sawi a, hmalakna kan ngaichâng mek a ni," an ti.