SEDP Board an ṭangkai tak zet - CM Board vice chairman-te MoS tluk an ni
Nimin Assembly session-ah chief minister Zoramthanga chuan, Mizoram sorkarin GAD hnuaia a din SEDP board 14-te chu an ṭangkai tak zet niin a sawi a, board vice chairman-te chu minister of state rank (tlukpui) an nih thu House a hrilh.
Congress Legislature Party (CLP) leader Zodintluanga Ralte chuan session ṭan níah Chief Minister-in sum a harsat thu a sawi chhuak tih sawiin, "Hetiang a nih lai hian GAD hnuaiah SEDP board 14 din a ni. LDC pahnih, fourth grade pahnih pek an ni a, ṭhenkhat phei chuan personal secretary an nei a ni àwm e. Hetih lai hian, an office-ah file pakhatmah a kal lo," a ti.
Zodintluanga Ralte chuan, board vice chairman-te chuan meeting lai bakin hna thawh an neih loh thu sawiin, "A behbàwm, office leh staff-te hi ṭhiatin, vice chairman ringawt hna thawk turin a siam theih ang em?" a ti a; vice chairman-te office neihtir a, thawktu pek chu a ṭulna a awm loh thu a sawi.
CLP Leader thusawi hi Chief Minister chuan chhángin, SEDP board-te chu an ṭangkai tak zet niin a sawi a, "A bikin road-ah phei chuan an insem a, chhim leh hmar vei ngat ngat group insiamin, kawng siam a ṭhat lohnate report an pe ṭhin. A hrang hrangah pawh committee nen, thil chi tinreng - policy thar, hnathawh dan thar leh monitoring dan tharte an ngaihtuah a ni," a ti.
Zoramthanga chuan, vice chairman ringawt dahin awmzia a neih loh thu sawiin, "Board record leh thil dang tam tak coordinate a ngai. Peon leh clerk an neih loh chuan a ngaihna a awm lo," a ti a, vice chairman-te chu a tlem thei ang ber thawktu pek an nih thu a sawi.
SEDP board-ah member an awm a ngaih thu sawiin Chief Minister chuan, "Department mi nen, thiamna bik nei leh pensioner-te pawh ruat an ni. Tun sorkarah phei chuan a tam thei ang ber project leh scheme base-a kal kan tum, state sorkar sum ringawt chuan a tih theih loh. Minister, secretary leh director chhukthla ringawtin thil tih vek sèn a ni lo," a ti.
INC member Lalrindika Ralte zawhna Chief Minister-in a chhàn danin, SEDP board 14-a vice chairman-te chu protocol purpose atan minister of state rank pek an ni.
Sorkar lirthei kawltir an ni lo a, mahse, board tinin pool vehicle pahnih ṭheuh an kawl thei thung.
MLA ni lai vice chairman an nih chuan MLA an nih anga hlawh leh hamṭhatna an neih bak hamṭhatna dang pek an ni lo. MLA ni lote chu lawmman (honorarium) thla tin Rs. 40,000, sitting allowance ni khatah Rs. 1,000, office landline telephone, thla khatah telephone/mobile phone allowance Rs. 1,000 leh travelling allowance class-I officer dawn ang pek an ni.