KHAWTHLIR

Nimin khan Assembly session-ah MNF member Lawmawma Tochhawng private resolution, 'Ṭhalaite mamawh infiamna lama sorkarin nasa taka hma a lak mekna hi a lawmawm kan ti a, chak taka hmalak chhunzawm zel ni se kan ti,' tih chu sawiho a nih hnuah pawm a ni. 

Pachhunga University College principal atan diltu Dr H Lalthanzara thlan a ni. Thu dawn danin, Dr H Lalthanzara hi PUC-a Department of Zoology-a zirtirtu, associate professor ni mek a ni a; tun thla tawpa pension-a chhuak tur Dr Tawnenga a thlâk ang.

Nimin tlai dar 3 vel khan Rinmuanpuia (10) s/o Vanlalzawna, Thenzawl Vengthlang, Vantawng chanchinbu joint editor fapa chu 407 truck MZ-06 6419-in a su a, Thenzawl damdawi-in thlenpui a nih hnuah a thi. Truck hi C Rodingliana, Thenzawl Field Veng ta a ni a, a khalhtu chu Zohmunsiama, Thenzawl Hermon Veng niin, police-in an man nghal a ni.

Mizoram State Legal Services Authority, National Institute of Locomotor Disabilities leh National Mental Health, Mizoram te chuan nimin khan Sairang YMA Hall-ah rualbanlote leh kum upate tan a thlawna inentirna an buatsaih. 

Mizoram sorkar chuan nimin khan MPS officer, district pathuma superintendent of police (SP)-te sîksawina thupek a tichhuak. Champhai SP Rex Zarzoliana Vanchhawng chu Lunglei SP-ah, Lunglei SP Stephen Lalrinawma chu Serchhip SP-ah, 4th IR second-in-command Lalrinpuia Varte chu Champhai SP-ah an awm dawn a ni.

State Referral Hospital-ah nimin khan Covid-19 vei mi pasarih dah luh an ni a, hripui laka fihlim tawh mi pali chhuahtir an ni thung. SRH-ah hian Covid-19 vei vangin mi 12 enkawl mek an ni a, an zinga pakhat chu ICU-ah awmin, ventilator hmantir mek a ni. Mi dang zawng Isolation ward-ah an awm. 

Kolasib-a Indian Council of Agricultural Research (ICAR), Mizoram Centre bultumin Ningani khan North Sabual-ah vawktê, vawk chaw leh vawk damdawi sem a ni. Mi 15 hnenah vawktê pahnih ṭheuh pek a ni a, tunlai thiamna mila hlâwk leh ṭha zawka vawk vulh dan zirtir nghal an ni. He project hnuaiah hian Vawngawnzo, Dárlâk leh Bâwngva khuaah vawk 30 ṭheuh sem a ni tawh bawk.

Mualpheng khawtlang chuan an khuaa chhungkaw pakhat, taksa bawrhsàwmna avanga thawk thei lote chu in an sak ṭhatsak. In sakna atan hian khawtlang mipuiin sum leh châkte an thawh khawm bakah, kohhran leh pawl hrang hrangin sum an thawh a; bialtu MLA R Lalzirliana'n in chung tur rangva a tum thung. Mualpheng khuaa buh tharte chuan chhuan chham mai turte vèn nan tun kar Thawhṭanni khan VC-ah buh an chhûng khâwm bawk.

Information & Public Relations director Lallianpuii chuan nimin khan Serchhipa an department pisa leh Serchhip Press Club thar a tlawh a; MJA, Serchhip district leh Serchhip Photographer Association hruaitute nen an inkâwm a ni.

Tlungvel VC chuan thuchhuah siamin, Muallungthu leh Khumtung inkalpawhna kawng a Tlungvel ram chhunga lo neite March 1, 2021 leh March 2, 2021-ah hal a nih dawn thu helai kawng paltlanga zin veivak ṭhinte in ruahman lawk theihna atan an tarlang.

Legal Services Authority, Aizawl chuan nimin khan Lok Adalat a buatsaih a, thubuai 120 ngaihtuah zinga 36 chinfel a ni. Thubuai chinfelte pawisa hlutna zat chu Rs. 30,14,840 a ni a; loan rûl ṭha thei lote'n an rulh theihna tura thubuai chinfel zat chu 21 niin, chuta pawisa hlutna zat chu Rs. 12,54,990 a ni.

Power & Electricity minister R Lalzirliana chuan ZPM Legislature Party leader Vanlalhlana zawhna ziaka chhangin P&E department chu corporation-a dah tuma hmalak mek a nih thu a tarlang a, "Dah a nih hun tur hi tun dinhmunah chuan sawi fak theih a ni rih lo," a ti.