COVID-19: Mizoram dinhmun Hripui vei mi 6 hmuh belh a ni
February 25, Ningani khan Mizoramah Covid-19 vei mi paruk hmuh chhuah a ni a, mi panga chu tualchhunga kái niin, natna (symptom) lang pathum leh naupang pathum an awm. Nimin khan SRH-ZMC aṭangin hripui laka fihlim tawh mi pali chhuahtir an ni.
Covid-19 Ningania hmuh tharte chu TrueNAT-PCR hmanga hmuh chhuah mi pakhat leh RAT hmanga hmuh chhuah mi panga an ni a; ZMC laboratory-a swab sample endik zingah hripui vei hmuh a ni lo.
Mizoramah Covid-19 vei mi 4,419 hmuh chhuah a ni tawh a, mipa 3,227 leh hmeichhia 1,192 an ni. Nimin tlai dar 5 thleng khan mi 4,386 (99.25%) chhuahtir an ni tawh a, mi 10 (0.23%) thi tawhin, enkawl mek mi 23 (0.52%) an awm.
Ningani khan ZMC laboratory-ah swab sample 25, TrueNAT-PCR hmangin district pathumah sample 26 leh RAT hmangin district pakuaah sample 944 endik a ni a; sample endik zawng zawng chu 995 niin, chu'ng aṭanga Covid-19 positive hmuh chhuah paruk chu 0.60% a ni.
February 25, 2021 thlenga Mizorama swab sample endik tawh zat chu 2,30,420 a ni a, chu'ng aṭanga Covid-19 positive mi 4,419 chu 1.92% a ni. Hripui vei hmuh tawh zinga mi 2,106 chu Mizoram chhunga kái chhâwng an ni a, mi 2,313 chu Mizoram páwn aṭanga an rawn luh hnua hmuh chhuah an ni thung.
District 11 zinga district paruk - Siaha, Kolasib, Serchhip, Mamit, Khawzawl leh Hnahthial district-ahte Covid-19 vei an awm tawh rih lo.
Covid-19 vei hmuh tharte
Aizawla hmuh chhuah:
Mission Vengthlang - 1: Hmeichhia kum 6, private hospital-a mit (eye) entir tura a kalnaa hmuh chhuah, symptom nei lo. Amah hi February 4, 2021-a positive tih lo hmuh chhuah tawh, a negative tawh vanga February 14-a CCC aṭanga chhuahtir tawh a ni.
Bawngkawn - 1: Mipa kum 33, symptom a neih vanga Bawngkawn Kiosk-a sample endik, hri a kaina hriat loh.
Samtlang - 1: Hmeichhia kum 1, symptom a neih vanga private hospital-a sample endik, hri a kàina hriat loh.
Nghalimlui - 1: Mipa kum 11, mitdel sikula luh dawn vanga sample endik, kàina hriat loh, symptom nei lo.
Champhaia hmuh chhuah:
Champhai Bethel - 1: Hmeichhia kum 40, Covid-19 symptom a neih vanga sample endik, hri kaina hriat loh.
Saitual district-a hmuh:
Darlawn Vengpui - 1: Mipa kum 48, Manipur aṭanga haw, Tuivai screening point-a hmuh chhuah, symptom nei lo.