LS MP-in Shillong-ah hma a la

Lok Sabha speaker Om Birla hoin nimin khan State Convention Centre, Shillong-ah mipui rorelna leh Panchayati Raj kalphung chungchang sawihona a ni a, Mizoram aṭanga Lok Sabha MP C Lalrosanga telin, district council leh tualchhung pawl hrang hrangte thuneihna sang zawk leh sum tam zawka thuam a ṭul thu a sawi.

Sorkar thuchhuah tarlan danin, Lalrosanga hian Shillong-a Food Corporation of India (FCI) Regional Office-a FCI hotute a kâwm a, Mizoram sorkar laka Hill State Transport Subsidy la pek lohte pek theih dan tur a sawipui a ni.

FCI hotute chuan, Mizoram harsatnate chu sorkar laipuia thlen turin MP chu thurâwn an lo pe a; Mizoram chu hmarchhak biala FCI buhfai phur chhuak ṭha ber pawl a ni tih an lo hrilh. 

C Lalrosanga hian February 24, 2021 khan Assam Rifles director general Lt.Gen. Sukhdeep Sangwan kâwmin, Myan­mar ramri leh Aizawl khawpui aṭanga AR insawn chhuah chungchangte a sawipui. Aizawl aṭanga Assam Rifles sawn chhuah chungchangah Assam Rifles DG chuan, hma thar lak mek a nih thu leh hna la zawh loh leh enfel ngai ṭhenkhat enfel mek a nih thu a sawi.

Ramri hrûla AR hnathawh dan leh Myan­mar aṭanga bungraw tawlh rûk chungchangah AR DG chuan, danin a phût angin AR-te chuan ramri aṭanga km 16 bial chhungah bungraw tawlh luh rûkte an dap ṭhin thu leh ralthuam ṭhahnem tak an man tawh thu a sawi. Myanmar-ah ram chhung buaina a awm leh tak hnuah ramri kâna India ram chhunga lo lut ru an awm thu hriat a nih loh thu a sawi bawk.