Kâng ṭhelhnaah kum 87 mi kâng hlum A chhungte zangnadawmna pek tum a ni

February 25, Ningani tlai khan Zamawia (87), Kepràn khua chu kângmei chhuak ṭhelh a tumna lamah meiin a kâng hlum. Environment Forest & Climate Change (EFCC) minister TJ Lalnuntluanga chuan, Kapmawia chhung­te zangnadawmna ngaih­tuahsak a nih tur thu a sawi.

EFCC Minister hian nimina Assembly session-ah Zamawia kan hlum chungchang a sawi chhuak a; February 25 tlai dar 3:30 velah Kepran khaw bula YMA Park bulah kangmei a chhuak tih sawiin, "Khawtlang mipuite ṭhelh turin an chhuak a ni. Kângmei ṭhelh zawh a nih tawh hnu, tlai dar 4 velah Pu Zamawia ruang hmuh a ni. A hmutute sawi danin, kângmei ṭhelhna hmanrua mau lo hûmin, a taksa erawh a chhe tawh hle," a ti. 

Zamawia chu kut hnathawka eizawng a nih thu sawiin TJ Lalnuntluanga chuan, "Mi taima leh tlawmngai tak a ni a, February 25 pawh hian YMA Park chhak kawng chunga an huanah a feh a ni. An huan chuanhnuai kâng ṭhelh a tumna lamah nunna a chán ta a ni. Thil thleng a hriat veleh bialtu MLA Pu Lalchhandama Ralte chuan thil awm dan a zawt kual nghal a, sorkar aṭanga puih theih a duh thu min hrilh," a ti a; Zamawia chhungte sorkarin a tawrhpui tak zet thu a sawi.

EFCC Minister chuan, Zamawia chhungte chu Darlawn Forest Division aṭangin ràlna Rs. 5,000 pek nghal a nih thu a sawi a, "Zangnadawmna pek theih dan tur Mizoram State Fire Prevention Committee-in a ngaihtuah dawn a ni," a ti.