Buh thar tipung turin theihtawpin Hmalak reng a ni - Agriculture Minister

Agriculture minister C Lalrinsanga chuan ZPM member Vanlalhlana zawhna chhángin, Agriculture department-in Mizorama buh thar tipung turin theihtawpin hma a lâk reng thu nimin khan House a hrilh.

Mizorama buh thar danin hma a sâwn tlangpui nia sawiin C Lalrinsanga chuan, "Buh chìnna hmun ṭhenkhat, a bikin tlang ram lo hi sorkar scheme hrang hrang leh chhan dang vangin tlakhniam cháng a nei. Chutiang bawkin leilet pawh thlai dang chìnna atan te, sangha dil atante hman a nih zel tâk avangin hmun ṭhenkhatah a tlahniam. Heti chung hian kum tina buh kan thar zat erawh chu a danglam lutuk lo. Hectare khata buh kan thar chhuah pawh hian hmasawn lam a pan zel a ni," a ti.

Agriculture Minister chuan, department-in buh thar tipung turin theihtawpin hma a lâk reng thu sawiin, "Department hnuaia scheme hrang hrang - National Food Security Mission, Rashtriya Krishi Vikas Yojana, National Adaption Fund for Climate Changte aṭangtein buh thar hlâwkna tur ruahmanna siam a ni," a ti a; scheme hrang hrang hnuaiah hian buh chi ṭha te, rannung leh natna laka thlai venhimna damdawi te, tui dah khawlna tanky te, pipe leh water pump set-te sem ṭhin a nih thu a sawi.

C Lalrinsanga chuan, lo/leilet neitute thlai chìn dan leh a venhim dan zirtir ṭhin a nih thu sawiin, "Loneitute'n tractor leh implements an hman atan custom hiring centre 181 din a ni a, power tiller pawh sang khat chuang lo neitute hnenah sem a ni tawh," a ti.

ZPM member VL Zaithanzama zawhna chhangin Agriculture Minister chuan, "Mizoram Remote Sensing and Space Application Centre-in Remote Sensing Technique hmanga agriculture area survey a neih aṭanga a lan danin, Mizoram leilet atan leilet siam theih zau zawng chu hectare 74,644 a ni," a ti a; kum 2019-20 chhungin Mizoramah buh quintal 6,02,390 thar a nih thu a sawi bawk.