Children Science Congress buatsaih a ni

Samagra Shiksha buatsaihin Ningani leh nimin khan Mizoram district ṭhenkhatah District Level Children Science Congress buatsaih a ni a, zirlai naupangte'n project an siamte an entirin an hrilhfiah.

Aizawl district-a Children Science Congress chu Ningani khan Education Complex conference hall-ah buatsaih niin, School Education director James Lalrinchhana'n a hmanpui. Director chuan, khawvel nunphung chu science-a innghat a nih tawh thu sawiin, "Zirna sang zawka zirtir thei tur khawpa academic studies ngaih pawimawh a ṭul. Thiamna sang zawk min pe turin kan ramah hnam dang kan la ruai nasa a, intodelh thei turin zirlaite'n ṭan an lâk a ngai a ni," a ti.

Children Science Congress hi tun kar chhunga neih tura ruahman a ni a, Ningani khan Aizawl bakah, Kolasib, Saitual leh Khawzawl district-ahte buatsaih niin, February 24 khan Serchhip district-ah buatsaih a lo ni tawh. Nimin khan Lunglei, Champhai, Lawngtlai leh Mamit district-ahte buatsaih ve leh a ni bawk.

District hrang hranga Science Congress buatsaiha ti ṭha child scientist thlan chhuahte chuan March 3-4, 2021 chhungin Aizawlah state level Children Science Congress an hmachhawn leh dawn a; Aizawla science zirna hmun pawimawhte tlawhpui nghal tum a ni.

Children Science Congress hi sorkar laipuiin kum 1993 aṭangin kum tin a buatsaih ṭhin a ni a, Mizoramah pawh Science Teachers Association Mizoram (STAM) hmalaknain buatsaih ve nghal a ni. Kum 2016 aṭangin RMSA leh STAM-te'n a huhoin an buatsaih ṭan. State level-a ti ṭhate chu Mizoram aiawhin India ram pum huap inelnaah an tel ve leh ṭhin a ni.