Aizawlah Outdoor Gym hawn a ni

Sports & Youth Services minister Robert Romawia Royte chuan nimin zing khan R Dengṭhuama Indoor Stadium-ah Outdoor Gym (open gym) bun thar a hawng.

Robert Romawia Royte chuan, outdoor gym chu mipui hman ṭangkai theih tur a ni tih sawiin, "Mizoram mipui hi India rama mipui fit ber, Mizoram hi India rama state fit ber ni tura hmalak kan tumna tihhlawhtlinna a ni," a ti a; outdoor gym chu a tahtawlin Mizorama district tinah dah tum a nih thu a sawi.

Sports Minister chuan, sports school dinna tur cheng nuai 16,000 chuang an nei tawh tih sawiin, "SYS department chuan theihtawp chhuahin infiamna ruhrel siamna turin lungphûm 28 lai kan phúm tawh a, heng hi sanction kan neih sa aṭanga a zatve pawh a la ni pha lo," a ti. 

A ṭul angin hmun hrang hrangah lungphûm an phùm zel dawn thu sawiin, "Tuna lung kan phùm tawhnaah hian hna bul kan ṭan vek tawh a, cheng nuai 17,000 hù vel project-ah bul kan ṭan tawh a ni," a ti.

R Dengṭhuama Indoor Stadium-a out door gym hi SEDP 2019-20 sum Rs. 60,00,000 hmanga siam a ni a, Mapuia Enterprise, Ritz Market, Aizawl chu supply leh installation hna thawk tura thlan a ni. Gym tihna hmanrua (equipment) 22 lei nan Rs. 55,70,000 leh a hmunhma buatsaih nan Rs. 4,30,000 hman a ni.