Martar chhungte leh rammúte Sorkarin chhawmdawl zel a tum

GAD changtu chief minister Zoramthanga chuan nimin khan Assembly session-ah ZPM member pahnih Lalchhuanthanga leh C Lalsawivunga te zawhna inṭâwm chhangin, hnam martar chhungte leh rammúte sorkarin chhawmdawl zel a tum thu a sawi.

Chief Minister chuan, hnam martar leh rammute tan special scheme ngaihtuah turin Rehabilitation & Resettlement Board din a nih thu a sawi a, "Special scheme hi chi hnih siam a ni tawh. Special Scheme for Peace Accord MNF Returnees hnuaiah sorkar hnaah mi eng emaw zat dah luh an ni. Special Package for Recruitment of Peace Accord MNF Returnees, 2018 hnuaiah mi 13 sorkar hnaah dah luh an ni," a ti.

Kum 1986-a remna thuthlung avanga Mizorama kìrte Maumualah in hmun pek vek an nih thu sawiin Zoramthanga chuan, "Mahse, a ṭhen chuan retheih avangin an hralh. Chhawmdawlna inzah vek kan dawng a, talent leh background a inang lo a, a rethei zualte chhawmdawl zel kan tum. Sorkar laipuiah chhawmdawlna dil belh kan tum," a ti a; state sorkarin theihtawp a chhuah zel dawn thu a sawi.

ZPM Legislature Party (ZLP) leader Vanlalhlana chuan, hnam martarte chu an tum independent sual chhuak lo mah se, hnam tana an inpekna a zahawm thu a sawi a, "An inpekna a ropui tak zet. An inpekna avangin pension pek leh chhiahah hriatthiamna neih an phû a ni," a ti.

Chief Minister chuan, pension inpek chungchang chu an ngaihtuah ṭhin thu sawiin, "Eng chin nge pek turah thutlukna siam a har. Kum 1966 aṭanga rammu tawh zawng zawng chu nuai khat an tlin a rinawm. Kum 1986-a inrem hnua rawn kîr chin ti dawn ila, inthîkna a awm thei. Tax exemption-ah pawh chutiang tho," a ti a; pension leh chhiaha inhriatthiamna chu a buaithlak thu a sawi.

Vanlalhlana'n hnam martarte'n an tum an hlen lo nia a sawi chungchangah Zoramthanga chuan, "Kan tum kan hlawhtling lo tih kan pawm a, India sorkar pawhin an tum an hlawhtling bik lo. Kan sír tlûk ve ve theihna inremna ang hian kan kal ta a ni," a ti.