Kum 2004-5 - 2019-20 inkarah Police-in silai 632 an man
Mizoram Police chuan kum 2004-06 aṭanga 2019-20 inkar, kum 15 chhungin silai chi hrang hrang 632 leh a mu leh magazine tam tham tak an man a; chu'ng silai man kaihhnawiha mihring man zingah Court-in mi pariat thiam loh a chantir tawh.
Assembly session neih mekah INC member Lalrindika Ralte zawhna Home minister Lalchamliana'n February 25-a ziaka a chhàn danin, Mizoram police-in tun hnai kum 15 chhunga ralthuam (silai) an mante chu - AK-47 rifle, .22 pistol, 5.56mm rifle, 7.62mm rifle, Glock pistol, 7.62 LMG 5.56 Browning Automatic Rifle, AK-56 rifle, G-3 rifle, 9mm pistol, MA-4 pistol, MA-3 pistol, MK-II (AK-47 type) rifle, .22 pistol (Colt), 9mm carbine, .45 pistol, SBBL gun, pistol (tualchher), airgun (Tomahawk), airgun (HATSAN)-te a ni.
Kum 2004-05 aṭanga 2019-20 inkarah silai 632 man a nih bakah, silai mu (ammunition) 47,510 man a ni a, silai magazine 314 man a ni. Silai man tam ber kum chu 2011-12 niin, silai 91 man a ni a, man tlem ber kum 2005-06 chhungin silai pakua man a ni. Silai mû man tam ber kum 2013-14 chhungin silai mu 18,194 man a nih laiin, man tlem ber kum 2006-07 ah chuan silai mu paruk chiah man a ni a; magazine man tam ber kum 2013-14 chhungin 103 man a ni bawk.
Home Minister chuan, silai man kaihhnawiha man zingah Court-in thiam loh a chantir (convict) tawh mi pariat an awm a, chu'ng mite chu Myanmar mi vek an nih thu a tarlang a; Court-a thubuai la inchiah mek mi 24 an awm thu a tarlang bawk. Court-a thubuai la nei mekte zingah Mizo bakah, Chakma pahnih, Tripura leh, Myanmar lam mite an tel.
2004-05 - 2019-20 inkara silai man zat
# Kum Silai Silai mû Magazine
1. 2004-05 14 195 2
2. 2005-06 9 201 2
3. 2006-07 13 6 -
4. 2007-08 44 7 -
5. 2008-09 26 27 -
6. 2009-10 25 22 1
7. 2010-11 52 151 1
8. 2011-12 91 243 3
9. 2012-13 78 13,100 78
10. 2013-14 71 18,194 103
11. 2014-15 83 6,215 50
12. 2015-16 53 1,668 44
13. 2017-18 23 2,899 22
14. 2018-19 27 3,421 4
15. 2019-20 23 1,161 4
TOTAL 632 47,510 314