Zoramthanga'n BJP ṭha a tih loh chuan NEDA aṭangin inhnûkdâwk se - BJP President

BJP Mizoram Pradesh president Vanlalhmuaka chuan, chief minister Zoram­thanga chu BJP ṭha lo a tih tak tak chuan BJP kaihhruai NDA leh NEDA member an nihna aṭangin inhnûkdâwk mai se a duh thu a sawi.

Vanlalhmuaka hian nimin khan an party pisaah thu­thar thehdarhtute kâwm­­in, Assembly ses­sion neih meka sakhaw zalenna duhna resolution sawihonaah Zoram­thanga'n, 'BJP an ṭha lo, keini pawhin ṭha kan ti lo... MNF chuan kan do zel dawn' tia a sawi thu a tarlang a, "Kan CM bawkin '...Keini pawhin in sawi zawng zawng dik kan ti, kan pawmpui vek che u...' tia a sawi hi kan la thutak hle. NDA leh NEDA constituent member tan chuan sawi âwm loh tak sawiah kan ngai," a ti.

Zoramthanga chu a thu sawiin a mizia a tihlan chian thu sawiin Vanlalhmuaka chuan, "Amah leh a kaihhruai party (MNF) hian BJP hi ṭha lo an tih tak zet a, MNF leh BJP chu inkalh tlata a ngai a, BJP sorkar kaih­hruaina hnuaiah Kristiante nêkchêpna tam tak a hriat chuan, 'Pathian leh kan ram tan' titu party an nih ang ngei hian BJP kaihhruai NDA leh NEDA constituent member a nihna aṭangin lo inhnûkdawk mai rawh se, tiin media kaltlangin thu kan thawn a ni," a ti.

Mizoram BJP President chuan, MPCC president Lal Thanhawla'n Congress Bhavan-ah 'BJP hian ILP ṭhiah an tum ngei ngei dawn a ni tih hi zawlnei pawh ni lo mah ila kan sawi ngam' tia a sawi thu tarlangin, "BJP kaihhruai NDA sorkar central sorkar kal hmang leh zia a hriat phâk tawh loh vangah kan ngai. BJP hi ILP hlîp zawnga hma la chi party an ni lo. ILP mamawhtu state pek belh chi party leh ILP nei mek thuam ṭha mektu party kan ni tih hi kan hriattir a ni," a ti. Lal Thanhawla chu ILP leh BJP chungchanga a thu sawi a dik dawn lo tih an hriattir lâwk thu a sawi bawk.