Zirtirtute an awmna hmun ngaia an awm chin tur bituk
School Education minister Lalchhandama Ralte chuan nimin Assembly session-ah 'Mizoram Education (Transfer and Posting of School Teachers) (Amendment) Rules, 2020 a pharh. Rules-ah hian, zirtirtu an awmna hmun ngaia an awm tur chin bituk a ni.
Mizoram Education (Transfer and Posting of School Teachers) (Amendment) Rules-ah hian Mizoram chu schedule paliah ṭhen a ni a, hmun kilkhâwr dan azirin scheduled chu duan a ni.
Schedule-I ah Aizawl leh Lunglei khawpui chhung dah a ni a, schedule-II ah district khawpui dang zawng leh khawpui aṭanga hla lo deuh khaw 77 dah a ni. Schedule-III ah chuan district khawpuiaṭanga khaw hla deuhte dah a ni a, a vaiin khaw 107 a awm a; schedule-IV ah chuan hmun kilkhawr deuhte dahkhawm niin, khaw 351 dah a awm.
Schedule hrang hranga a rei lo bera an awm hun chhung tur chu - schedule-I ah kum 6, schedule-II ah kum 5, schedule-III ah kum 4 leh schedule-IV ah kum 3 a ni. An awm hun chhung an awm tlin hmain medical ground-a transfer theih a ni a, chu chuan natna chi hrang pakua a huam a ni.