Naupang rûkbo tuma puh hnam dangte Mipuiin kut an thlâk, motor an hâlsak "Naupang rûkbo tumtu an nih loh hmel" - Police

February 24, Thawhṭanni tlai dar 3 vela West Lungdar khuaa mipa naupang kum 13 mi hruai bo tuma puh hnam dang pathumte chu February 25, Thawhlehni tlai khan South Sabual khuaa man an nih hnuah mipui thinrimin kut an thlâk a, an motor an hâlsak bawk. Hetih lai hian, hnam dang an man mi pathumte chu naupang rûkbo tumtute an nih loh hmel thu police hotute'n an sawi.

Police hotute hnen aṭanga thu dawn danin, West Lungdar khaw naupang kum 13 mi, Presbyterian English School-a pawl 7 zirlai chuan, February 24 tlai dar 3 velah a léng haw chu Bolero motor vára chuang hnam dang (vai) pathumin a ká hupin, rûkbo tumin motor-ah an pawt lut a; mahse, West Lungdar leh Khawrihnîm inkara Ramlaituia zunram an thiar laiin motor aṭanga put chhuakin, a tlanchhia a, a him thei a ni.

'Hnam dang pathumin West Lungdar naupang pakhat khawlaia lo awm lai chu a ká hupsakin an motor-ah hlángin an tlânpui a, naupang hi a rubotute lak aṭang hian a tlan chhuak' tih thu February 24-ah social media hrang hrangah a darh. Khuangchera Group YMA huam chhunga khaw hrang hrang YMA-te chu an khaw ram chinah an duty nghal a; West Lungdar bakah, South Sabual leh Khawlêk tlangdung te, Darlung lam thlengin duty an insiam a, khaw eng emaw zat chu February 24 zan khan tlaivarin an duty a ni.

Vanglaini palai zawhna chhánga Mizoram police-a CID hotute'n an sawi danin, naupang rûkbo tum ni tûk (February 25, Thawhlehni) khan chawhma lamah TV zuar hnam dang pathum, Bolero dum (black) AS-11 D-7533 hmanga Aibawk lam aṭanga khawthlang lam pante chu South Sabual khaw mite'n naupang rûkbo tumtute nia ngaiin an lo man a.

Hnam dang pathumte South Sabuala man an nih hnuah police-te'n South Sabual an pan a, an thlen veleh khawtlang hruaitute hnen aṭangin mi pathumte chu an la nghal. Mi pathumte chu police-te chuan Aibawk/Aizawl lam panpui loin West Lungdar lamah an hruai a, tlai dar 4 velah West Lungdar an thlenpui. Vai pathumte chu amah rukbo tumtute nia naupangin a sawi hnuah mipui thinrimin kut an thlâk a; an motor pawh West Lungdar field-ah an hâlsak a ni. Hnam dang pathumte hi an hliam vek a, police-te'n Aizawlah la chhoin, damdawi-inah an hruai nghal.

Hetih lai hian, CID hotute chuan, naupang rûkbo tumtu nia ngaia mipuiin kut an thlak hnam dang pathumte chu naupang rûkbo tumtute an nih a rinawm loh thu Vanglaini palai an hrilh.

Police-te sawi danin, Vairengte ILP checkgate-a chhinchhiah dan chuan, mipuiin an sawisak vai pathumte chu February 24, Thawhṭanni chhun dar 11:30 velah Assam 

aṭangin Vairengte kal­tlanga Mizorama lut an ni. 

February 24 tlai dar 3 vel­ah naupang rûkbo tum a ni a, hnam dang pathumte chu chawhma dar 11:30 velah Vairengte-ah an la awm avangin, tlai dar 3-ah West Lungdar thlen hman ngaihna a awm loa ngaih a ni.

Naupangin amah rûkbo tumtute motor chu a vár (white) nia a hriat thu a sawi laiin, an man tâk vai pathumte motor chu a dum (black) a ni thung.

Naupang rûkbo tuma puh hnam dang pathumte hi February 24 zan khan Leela Hotel, Ṭhuampuiah an riak nia thu dawn a ni bawk.

Thil thleng chung­changah hian police-te'n thubuai pahnih an ziak lut a; inrûkbo tum chung­changah FIR a luh angin kidnap case ziah a nih bakah, motor hâl leh kut inthlak chungchangah West Phaileng Police Station-ah thubuai ziah luh a ni.

Hetih lai hian, social media lamah chuan, hnam dang pathum an mante hi police leh khawtlang hruaitute'n an dâwpnaah, naupang rûkbo tumtute an nih thu an inpuang anga tarlan a ni.