Mizoram State Day lawm a ni
Nimin February 20 kha India danpui hnuaia Mizoramin state anga a inrêlbawlna a neih ṭan ni, State Day vawi 33-na a ni a; State Day hi Mizoram sorkar huaihawtin Vanapa Hall-ah lawm a ni a, Governor Kummanam Rajasekharan leh chief minister Zoramthanga ten an hmanpui.
Governor chuan, Mizoramin state puitling a nihna a lawm thei chu thil ropui tak a nih thu sawiin, "Mizoramin state a nih theihna tura an theihna zawng zawng leh nunna hlu tak lo hlantute zawng zawng zah leh chawimawi hi khua leh tuite mawhphurhna a ni. Kum 20 hun harsa chu kum 30 chhunga remna leh muana hnuaia hmasawnnate'n a thawi dam thawkhat tawh a ni," a ti.
Larsap chuan, Mizoram chu state puitling a nih angin, mipuite pawhin India danpui hnuaia khua leh tuite mawhphurhnate ṭha taka zâwmin, hmasawnna lamtluang an zawh a ngaih thu sawiin, "Remna leh muanna hnuaiah Mizoram sorkar chuan hmasawnna ngelghet siam chho mekin SEDP leh hmachhawp pawimawh tak tak kaltlangin ṭan a la chho dawn," a ti a; hmasawnna hna thawh tur tihlawhtling tur chuan mipuite'n sorkar an thlawp tlat a ngaih thu a sawi.
Chief minister Zoramthanga pawhin thu sawiin, State Day, sorkar chawlha puan a ni chunga a puala hun hman a awm ṭhin lo chu dik loa a hriat ṭhin thu a sawi a, "Kuminah State Day puala hun hman turin rawtna ka siam a, hun hman a ni ta a. India ram pawhin Independence Day leh Republic Day ropui takin a lawm ṭhin a, kan Independence Day leh Republic Day ni kawp hi ropui takin lawm a ni dawn lo'm ni? Kum dangah pawh ropui zawka lawm dan ngaihtuah a ngai," a ti.
Zoramthanga chuan, State Day chu remna rah chhuah a nih thu sawiin, "Remna thuthlung hlawhtling ber zinga mi kan neih theihna kawngah Mizo mipui, kohhran, tlawmngai pawl, zirlai, sorkar hnathawk leh MNF-te thawh hlawk dan a inang tlang vek. State Day hi a chhunga chengte tan mai bakah hmun hrang hranga cheng Mizo mipuite tan a hlu em em a ni," a ti a; Mizote chu India sorkar leh MNF duh dan ni chiah lo, Pathianin a duh dana remna a pek thu a sawi.
Inremna avangin Mizote'n India danpui lak aṭang pawha invenna an neih thu sawiin Zoramthanga chuan, "Inremna hi duh duha tihdanglam ngawt theih a ni lo. Tihdanglam a nih dawn chuan 'Kan silaite mi pe kir ula, kan rammu leh ang' kan ti thei. Chutiang chu tu mah mahin kan duh lo ang. Chutiang inremna chuan min hung a ni," a ti.
State Day lawm inkhawm hi chief secretary Lalnunmawia Chuaungo-in a kaihruai a, NGO Coordination Committee chairman Vanlalruata leh Mizoram Kohhran Hruaitu Committee general secretary Rev. R Lalrinsangate pawhin thu an sawi. State Day lawmna inkhawmah hian minister, MLA leh sorkar officer-te an tel.
February 20, 1987 khan Mizoram chu union territory aṭangin India ram state 23-na ni tura hlankai a ni a, a tirah district pathuma ṭhen niin, tunah chuan district pariat a awm tawh a ni.