Engkim ṭhat duhna ram Pathianin min pe - CM

Chief minister Zoram­thanga chuan, Mizote chu engkim ṭhat duh vekna ram Pathianin a pek thu sawiin, "Kan rama malsawmna awmte hai chhuak tur hian kan ngaihtuahna kan thlakthleng a ngai," a ti.

Nimina State Day lawmna inkhawmah thu sawiin Chief Minister chuan, Mizoramah ram ruak sq.metre 21,000 vel a awm thu a sawi a, "A teh dan hi boruak mél a ni a, pang a neih theih vek avangin a neih theih chin chu sq.km. 30,000 vel a ni ang. Mizoram hian chhungkaw nuai hnih âwrh kan awm a ni," a ti a; ram ruak chu chhungkaw tinin ṭín 40 vel ṭheuha insem theih a nih thu a sawi.

Zoramthanga chuan, Mizoram sik leh sá leh ruahtui tlak dan chu a tâwk viau tih sawiin, "Israel-ah chuan nasa taka an enkawl avangin hmun hring an nei a, kan ramah chuan enkawl loh vangin hmun hring kan nei. Engkim a ṭha duh vek a, lei hnuai hausakna pawh ṭhahnemtak a awm. Chutiang ram chu Pa­thianin min pe a ni," a ti. 

Chief Minister chuan, Pathianin ram ṭha tak Mizote a pek chu chona ropui tak a nih thu sawiin, "Mau hi Pathianin kan ram tana min pek a ni. Delhi-ah Agriculture leh Horticulture minister-te ka sawipui chhin a, mau buaipui turin kawng ṭha a ngaih thute ka hrilh a, kawng siamtu a nih loh thute min hrilh," a ti a; mau chungchang chu sorkar laipui thuneitute an bangbo avangin sut tur a chhah tur thu a sawi.

Mau chungchangah Delhi lam la bangbo rih mah se, nakin lawkah chuan hriatthiamtir an tum tih sawiin CM Zorama chuan, "Pathianin malsawmna min pekte hai chhuak tur chuan kan ngaihtuahna kan thlak a ngai. Heti em em hian Mizoram hi a lo hausa a ni maw, khawvel mipuiin an tih theih turin ṭan lak a ngai a ni," a ti.