Mizorama thlawhna thlawh belhtir turin Governor-in Aviation Minister a ngen

February thla tìr lama Jet Airways-in Mizorama an service an tihtawp vanga mipui harsatna sutkian dan zawngin governor Kummanam Rajasekharan chuan New Delhi-ah Union Aviation Minister leh Aviation thuneitu sangte chu February 18, 2019 khan a kâwm. Aviation minister Suresh Prabhu chuan, thlawhna service indaih loh vanga Mizoram mipui harsatna chu a rang lama chinfel a nih tur thu a lo a tiam. 

Governor chuan, Jet Airways-in Mizoram an chhuahsan avangin Mizoram mipuite'n Guwahati leh Delhi pan turin harsatna an tâwk nasa tih Aviation thuneitute a hrilh a; sorkar thila sorkar laipui dawr kawngah harsatna a awm phah bakah, damlohna vanga phai lam pan ngai damlote'n harsatna an tawk nasa lehzual tih sawiin, "Tunah pawh damlo chhungkaw tam takin harsatna an tâwk mek a ni," a ti. 

Aizawl leh Guwahati inkar bakah, Aizawl leh Delhi inkarah thlawhna service pangai a awm leh theih nan Air India chu thlawhna thlawh belhtir turin Aviation hotute Larsap chuan a ngen a; Air India bakah, airlines dangte pawh Mizoramah an luh theih nan hma la turin Aviation Minister chu a ngen a ni.

Mizoram Governor thlen chu Aviation minister Suresh Prabhu chuan ṭha takin a dawngsawng a; Mizoram mipuite harsatna sukiang turin theihtawp a chhuah tur thu leh, India hmarchhak biala thlawhtheihna hmanga inkalpawhna changtlung zawk ruahman chu sorkar ngaih pawimawh ber pakhat a nih thu a sawi.

Governor leh Civil Aviation Minister-te inkawmnah hian Civil Aviation secretary Ashwini Kumar Lohani joint secretary Usha Padhee te pawh an tel. Ashwini Kumar chuan, thlawhna service indaih lohna vanga Mizoram harsatna chu sorkarin a hriat thu sawiin, "Service company dangte pawh Mizoramah an luh theih nan kawm kan tum mek a ni," a ti a; Indigo chu Agartala leh Aizawl inkara thlâwk ṭhin turin an inpeih thawkhat tawh niin a sawi bawk.