Myanmar ram chhung buaina vangin Ramrî hrúlah India sipaite dah an ni

Tunlai hian Myanmar ram chhunga Mizoram hnaih tak takah Myanmar sipaite leh hel pawl Arakan Army (AA)-te nasa takin an inkâp a, chuvang chuan ramri hnaiha awm Mizoram khaw ṭhenkhata mipuite pawh inrálrintir an ni. Ramri hnaihah hian India sipai eng emaw zat inring rengin an awm nia thu dawn a ni.

Tun hnai khan Mizoram chhim lam, Lawngtlai district chhungah sipai eng emaw zat an che vel a, chu chuan mipui ngaih a tihṭhat loh avangin social media-ahte sawi a hlawh hle. Lawngtlai SP erawh chuan Deputy Inspector General of Police (Southern Range) hnenah report a pekah chuan, sipaite chu Assam Rifles an ni a, an tih dan phung pangngai anga joint exercise nei an nih thu leh, Assam Regiment sipai an nih loh thu a tarlang. 

Hetih lai hian, Lawngtlaia chanchinbumi pakhat chuan, tunlaia Lawngtlai district chhunga sipai che velte chu Assam Rifles chauh an ni loa a hriat thu leh, regiment lam mite pawh an tela sawi a nih thu a sawi a; sipai che vel chu Assam Rifles battalion hrang hranga sipaite'n joint exercise an neih vang nia Lawngtlai SP-in a tarlan chungchangah, "Tun hmain hetianga Assam Rifles joint exercise hi heng lamah chuan ka la hre ngai lo," a ti. 

CID (Special Branch) hotute chuan, Mizoram chhim lama India sipaite awm dan chu kimchang takin an la hre lo tih an sawi a; sipaite an awm a nih pawhin mipui venghim tur leh a ṭul anga hma la tura awm a nih an rin thu te, sipaite chet vel dan chu India sorkarin Mizoram sorkar a hriattir mumal lo nia a lan thute leh, Mizoram police-a CID-te'n a hmunah an ngaihven ve mek thute zawhna chhangin Vanglaini an hrilh.

February 18, 2019 khan Vaṭhuampui khuaah chuan khelmualah mipui koh khawm an ni a; chu chu free health check-up anga sawi ni mah se, an koh khawm chhan zawk tak chu - Myanmar lam buaina vanga inrálrinna thil a nia thu dawn a ni. Vawiin hian DIG (Southern Range) leh police hotu ṭhenkhat chu chhim lam dinhmun enfiah turin an kal dawn nia thu dawn a ni bawk.

Myanmar news agency pakhat website irawaddy.com-in February 18, 2019-a a tarlan dan chuan, Myanmar sipaite leh AA-te an inkah nasat zual zel avangin Myanmar ramri hnaih Lawngtlai district chhungah India sipai company pahnih dah an ni tawh.

Assam Tribune pawhin Myanmar ramri hnaihah hian India-in sipai ṭhahnem tak a dah thu February 17, 2019 khan a lo tarlang tawh a; sipai dah an nih chhan chu, AA hel pawl mi leh sate Mizoram (India ram) chhunga an lut tur lo ven leh ramri hnaih khuaa mipuite himna atan a ṭul anga hma la turin a ni. Report chuan, India sipaite chuan February 16, 2019 khan ramri an thleng niin a tarlang bawk.

The Irrawaddy tarlan zel danin, AA thupuangtu U Khine Thukha chuan, Myanmar leh Mizoram ramria India-in a sipai 500 chuang a dah tawh thu, February 18 khan a sawi a; India sipaite chu Parva leh Lungpuk khuaahte awmin, km. 22 vel bial chhung an vil a ni.

U Khine Thukha chuan, tun hi Mizoram leh Myanmar inrina Lawngtlai district chhunga India-in kum tam tak chhunga a sipai tam tham taka a dah vawi khatna nia an hriat thu leh, India sipaite chu Myanmar sipaite nen ṭangrual a, a ṭul huna AA mite bei tura dah an nih an rin thu, The Irrawaddy a hrilh.

Khine Thukla chuan, "India sorkar hnena ka chah duh chu - an tan Myanmar sipaite (ICC wanted criminals) nena thawh dun hi thil inhmeh lo tak a ni a, ICC criminal-te hnena thawkho lo turin ka chah a ni," a ti a; Myanmar sipaite chu kum 2017 aṭanga Rohingya mipui laka rawng taka che an nih thu a sawi. 

Hetihlai hian AA-te hi Arakan Rohingya Sal­vation Army (ARSA)-te'n an pui niin Chin state-a media pakhat, i-Vision chuan a tarlang bawk.

Myanmar lamah chuan tun hnai khan Myanmar sipai officer-te leh India sipai hotute an inhmuh thu social media hrang hrangah a darh a ni.

Myanmar sipaite leh AA mite hi nasa takin an lo inbei tawh ṭhin a, kum 2017 pawh khan Myanmar ram chhung, Paletwa leh a chhehvela mi 1,750 vel chu an sahimna zawngin Mizoraman an raltlan tawh a; an zinga mi 200 vel chu September 2018 thleng khan Mizoramah an la awm. 

Tun hnaia Myanmar sipaite leh AA inkahna avangin Myanmar aṭanga Mizorama civil mi raltlan an la awm lo nia thu dawn a ni.

Nimin khan Aizawlah chîl puah bomb (land mine bomb) kamna hmuna hman ṭhin sipai motor Mine Protected vehicle (MPV) pahnih hmuh a ni a, Mizoram chhim lamah an kal zui dawn nia thu dawn a ni. 

Myanmar sipaite leh Arakan Army-te an inkah hnuah Mizoram chhim lama India leh Myanmar inriniah bomb kam ruk eng emawzat a awm ṭhin a, vanduaina tawkte pawh an lo awm tawh a ni.

MPV Casspir an tih hi Vehicle Factory Jabal­pur (VFJ) siam a ni a, India sipaite'n hmarchhak state-ah leh Jammu & Kashmir-ahte an hmang ṭhin. A chhungah hian sipai thuam famkima inthuam mi 12 an chuang thei a, ralthuam chi hrang hranga thuam niin, a darthlalangte pawh páwn lam aṭangin silaia kah tlang theih loh (bullet proof glass) a ni.