Culture vawng nung turin chhungril nun leh Páwn lam lan dan a pawimawh - R Lalzirliana

Mizo Cultural Organisation (MCO) chuan nimin khan Zarkawt Recreation Centre-ah MCO Cultural Day an hmang a, Art & Culture minister R Lalzirliana khuallian a ni. Minister chuan, Mizo-na (culture) chu páwn lam incheinaah chauh ni lo, thinlung aṭanga lantir a ṭul thu leh, Mizo tlawmngaihna leh central service-a Mizote an tling hlei thei tawh lo chu inmil loa a hriat thu a sawi.

Art & Cultute Minister chuan, Mizo hnam ziarâng chi hrang hrangte chu ngaihhlut leh ngaihsan thar a ṭul thu sawiin, "Pathian min dahna, he Mizo hnam hi engtikah mah kan thlak thei dawn lo a, kan nihna kengtu a nih avangin ngaihhlut hi kan tihmâkmawh a ni. Tlawmngaihna hi taimakna leh tumruhna nen kan kal kawptir a ngai," a ti.

Tunlaia Mizo ṭhalaite tlawm-ngaihnaah thawhrimna leh beih ṭâng ṭângna a tel tlem taa a hriat thu sawiin Lalzirliana chuan, "Hmarchhak state zingah pawh central sevice leh all India service-ah ṭhenawm state-te'n min hmakhalh ta zar zar mai. Ṭhenawm state-te kan tluk lo hi Mizo tlawmngaihna nen a inhmehin ka hre thei lo," a ti a; Mizo ṭhalaite chu ṭan la thar a, Mizo tlawmngaihna dik chhawm nung turin a fuih.

R Lalzirliana chuan, Mizo culture chu thawmhnawah chiah a awm lo tih sawiin, "Pàwn lam incheina ringawt ngai pawimawh a, nuna Mizo ze mawi hmuh tur awm leh si lo kan awm ṭhin hian klan hmel a tibâl ṭhin," a ti a; Mizo culture vawng nung turin chhungril lam nun leh páwn lam lan dan a pawimawh ve ve thu a sawi.

Art & Culture Minister chuan, Mizo-ah hnam pêng hrang hrang ṭhahnem tak a awm a, ramri ṭhen danin a zir loh vanga hmun hran hrana awm darh an nih thu sawiin, "Kan ṭawng hmante pawh a dang hret hret a, kan pi leh pute aṭanga unau leh hnam khat kan nihna hi kan hriatreng a ṭul. Mizo tihah hian Chhinlung chhuakte kan inchhûng lut vek a, kan zavai hian Mizo kan ni tih pawm thiam a pawimawh," a ti.

MCO hi February 13, 1993-ah Aizawla cultural club pasarih kal khawmin an din a ni a, Aizawlah branch 68 an neih mek bakah, Kolasib, Champhai, Serchhip leh Mamitahte sub-headquarters an nei a; Khawhai leh Chhawrtuiah group headquarters an nei bawk.

MCO Cultural Day-ah hian MCO club hrang hrangte'n hnam lâm chi hrang hrang an entir a, zaithiamte'n Mizo hla (folk song)-te an sa bawk a; MCO president James Lalchhuanawma pawhin thu a sawi a ni.