Sorkarin party dangte a kal kân lo ang - Lalchhandama Ralte

Kawnpui MNF chuan nimin khan an khuaa Awithangpa Hall-ah Mizoram sorkar thar lawmna inkhawm an buatsaih a; khuallian Lalchhandama Ralte, School Education minister chuan, MNF sorkar chuan party dangte a kal kân dawn lo niin a sawi.

Lalchhandama Ralte chuan, Mizoram sorkar chu party mal sorkar a ni lo a, mi tin huap a nia sawiin, "Sorkar thar hian party dang pawh ni se a kal kân dawn lo a, tu party pawh ni se, hmeithai leh pachhiate kal kân kan remti dawn lo," a ti.

Minister chuan, "Education-ah 7th. Pay la hmu ve lote pawh January 2019 aṭanga la turin pek nghal an ni. Sikul ṭan hun pawh khawtlang nunphung milin zing dar 9-a ṭan turin thu tihtluk a ni a, eng emaw vanga ṭan hma ngai an awm chuan sorkarah dil theih a ni," a ti a; SSA leh RMSA zirtirtu thla thum hlawh pek loh chu pek nghal a nih thu a sawi.

Sikulah zirtirtu indaih lohna a nasa tih sawiin Lalchhandama chuan, "Zirtirtu pension leh thi post ruak 2,300 chuang a awm a, chowkidar leh peon, LDC post ruak eng emaw zat a awm bawk. Post ruakte hi hnawhkhat turin ruahmanna kalpui mek a ni a, a theih chin chinah a khaw mite duhsak an ni ang. Thâwk leh khata hnawhkhah vek theih a ni lo a, sorkar kalphung zuiin a tahtawlin hmalak a ni ang," a ti.

Lalchhandama Ralte chuan, MNF policy SEDP kalpui nan sorkarin budget session hmasa berah sum a dah dawn tih sawiin, SEDP chu kut hnathawktute khai chhuahna tur a ni tih hria a, a nih dan anga hman tum tur leh rinawm taka tihlawhtling turin kalkawmte a sáwm a ni.