PUC-in khaw chuam atan Dulte thlang

Pachhunga University College (PUC) chuan kum 2019 chhunga an khaw chuam 'Adopted village' atan Dulte khua an thlang a, nimin khan PUC Mathematics department-a zirtirtu L Thangmawia, Lengteng bialtu MLA ni bawk chuan Dulte community hall-ah a hawng.

PUC adopted village hawnna inkhawm hi PUC principal Dr Tawnenga'n a hawng a; Dr Tawnenga chuan, kum 2012 aṭangin khaw chuam an neih ṭan thu sawiin, "Khaw chuama kan thlante chu mithiam rualte'n zir chiangin, research hrang hrang an bei ṭhin a, research paper-te chu sorkarah thehlutin bawhzui a ni ṭhin. An khawtlang mamawh hrang hrangte kan ngaihtuahsak a, zirna lamah te, khaw-tlang nunphungahte an hmasawnna tur ngaihtuahin kan ṭanpui ṭhin a ni," a ti.

L Thangmawia chuan, khawtlang hmasawnna turin thil hlu lian tham PUC-in pek tur an nei lo tih a sawi rualin, PUC zirtirtu thiam tak takte hmangin zirna lama hmasawnna a thlen ngei a beisei thu a sawi a; adopted village programme hmangin Mizorama mithiam leh mi ṭangkai tak tak Dulte khua aṭangin an chhuah phah a beisei thu a sawi bawk.

Dulte khua hi Champhai district-a awm, Aizawl aṭanga km. 110 vela hláa awm a ni a, chhungkua 200 vel chenna khua a ni. PUC hian khawtlang mamawha hman atan computer set leh printer an pe a, NSS aṭangin an mamawh hrang hrang an la pek dawn bakah, PUC zirtirtu mi paliin research an ti a; Dulte zirlaite tan 'Incentive cash award' an pek dawn bakah, zirlai leh upa pawlte tan excursion buatsaihsak an tum bawk a ni.

Khaw chuam hawnnaah hian PUC zirtirtu leh zirlai 30 vel an kal a; Aizawl North-II bialtu MLA Dr Vanlalthlana, PUC-a assis­tant professor pawh a tel. hawnna inkhawmah hian Dr H Lalruatsanga'n climate change awareness cam­paign a nei nghal bawk.

PUC hian a hmain adopted village atan Phulpui leh Lungleng khuate an lo thlang tawh a ni.