India palaiin minister-te a kâwm

Azerbaijan-a India ambassador thar B Vanlalvawna chuan February 19, Thawhlehni khan Rural Development minister Lalruatkima, Tourism minister Robert Romawia Royte leh chief secretary Lalnunmawia Chuaungo te chu an pisa ṭheuhah a kâwm.

Lalruatkima chuan, RD department hnuaia scheme hrang hrang tarlangin, "Bangladesh leh Myanmar inrina laia awm khuaah Border Area Development Programme (BADP) kalpui a ni. Heng hmuna khaw hrang hrangte'n changkan lam an pan zel a, thingtlang khuaten khawpui ruala ke an pên ve theih nan RD department chuan 

ṭhahnemngai takin hna an thawk a ni," a ti.

IPR minister ni bawk Lalruatkima chuan MJA-te tan press tour huaihawt ṭhin a nih thu sawiin, "Chanchinbumite'n khaw hawi zau zawk an neih a pawimawh," a ti a; ram dang thlenga tour an neih theih a duhsak thu a sawi.

Minister Robert Romawia Royte chuan, B Vanlalvawna chu India sorkar palai a nih angin, Mizoram mamawh thil tih theih tam tak a nei dawn tih a hrilh a, a ambassador puite leh ram danga sorkar mi liante nen inlaichinna ṭha a lo siam tawhte chhawr ṭangkaiin, ram tana thil ṭha a tih ngei a beisei thu a sawi.

Sports Minister chuan, Azerbaijan chu infiamna lam, a bik takin boxing-ah an san avangin Mizorama boxer ṭhate hmasawn leh zualna turin intlawh tawn dan kawng zawn ni se a duh thu a sawi bawk.

Chief Secretary chuan, Mizoram hmasawnna tur ngaihtuaha inhawng taka Azerbaijan Ambassador tharin Mizoram sorkar hotute a kâwm chu lawmawm a tih thu a sawi a; a hna zawm thar turah hlawhtling taka thawk turin duhsakna a hlan a ni.