KHAWTHLIR

RIPANS, Aizawl leh Lenrual Hlui (1980-83 a PUC-a science zirlaite) ṭang dun chuan, nimin khan Saipum khuaah damlo a thlawna inentirna, free clinic an huaihawt a, mi 403 an inentir. Free clinic-ah hian Lenrual Hlui member doctor parukin damlote hriselna a thlawnin an endik a, RIPANS-in damlote a thlawnin damdawi an pe thung.

Minister K Lalrinliana, Kolasib bialtu MLA chuan nimin khan Kolasib District Park, Thingdawl a tlawh a, tihchangtlun dan tur a enfiah. Kolasib DLAO ST Lalhmingmawia leh PHE executive engineer H Lallianmawia te nen park-a tui lak dan tur an enho nghal bawk.

Information & Public Relations department chuan India International Centre, New Delhi nen ṭangkawpin nimin aṭang khan New Delhi-a India International Centre Annexe, Lodhi Estate-ah Art Exhibition Contemporary Paintings by Leading Artists of Mizoram an buatsaih ṭan a, tun February 26 thleng a awh ang. Exhibition-ah hi Mizoram Art Development Society member kutchhuak 27 pho chhuah a ni. 

Chhingchhip Area Mizoram Upa Pawl chuan nimin khan Chhingchhip Middle School-ah inkhawmpui an hmang a, Assembly deputy speaker Lalrinawma, bialtu MLA-in a hmanpui. Lalrinawma chuan, MUP member nih chu malsawmna chhinchhiahna a nih thu sawiin, "Vawiina MUP member-te hian in vanneihna leh malsawmnate rilruah vawng reng turin ka chah che u a ni," a ti. Chhingchhip area-ah hian MUP branch pasarih a awm a ni.

Nimin khan MZP Pisapuiah MZP hruaitute leh Falam University Students' Fellowship hruaitute an inkâwm. Falam University Students' Fellowship member-te hotu Van Khawm Thang chuan, khawchhak lama Zo fate'n harsatna an tawh chánga MZP leh Mizote'n kawng engkima an pui ṭhin chu lawmawm an tih thu a sawi. Falam University Students' Fellowship member-te hi Chin Pawlpi Aizawl-in nizana Vanapa Hall-a Chin National Day an lawmna hmanpui tura rawn zin an ni.