CADC area-ah NRC kalpui nia ngaiin Chakma-te'n Prime Minister an hmu
Mizorama Chakma district-a political party leh tlawmngai pawl tin aiawhte chuan, Chakma Autonomous District Council (CADC) chief executive member Rashik Mohan Chakma leh Mizorama BJP MLA Dr Buddha Dhan Chakma hoin March 2, Thawhṭanni khan prime minister Narendra Modi an hmu a; CADC chhungah Mizoram sorkarin National Register of Citizens (NRC) a kalpui nia ngaiin, PM hnenah an thlen.
Mizorama Chakma district-a political party leh tlawmngai pawl tin aiawhte chuan, Chakma Autonomous District Council (CADC) chief executive member Rashik Mohan Chakma leh Mizorama BJP MLA Dr Buddha Dhan Chakma hoin March 2, Thawhṭanni khan prime minister Narendra Modi an hmu a; CADC chhungah Mizoram sorkarin National Register of Citizens (NRC) a kalpui nia ngaiin, PM hnenah an thlen.
CADC CEM, hruaitu dangte leh Chakma NGO-te chuan, Mizoram sorkarin CADC huam chhunga NRC survey an neih chu dan kalh niin an tarlang a, "February 13, 2020-ah Lunglei District Local Administration Officer-in hriattirna a tichhuak a, VC President tinte chu an huam chhungah NRC survey team-te ṭha taka lo pui tur leh, a ṭul angin riahna, ei in tur leh ṭawng lettute lo pe tura hriattir an ni," an ti.
NRC survey neih tawhna Chakma chênna khua an tarlante chu - Lunglei district-ah Bornasury (under Khojoisury VC), Khojoysury Chhuah (under Khojoisury VC), Chandobighat (under Khojoisury VC), Letisury under (Khojoisury VC), Lareiveng (under Khojoisury VC), Dursury (under Malsury VC), Nakuksora village (under Hmondo VC), Saisen under (Hmondo VC), Gorosora under (Kalapani VC), Bandiasora (under Hmondo VC), Gorosora, Phainuam (under Marpara South VC), Tarabonia (under Marpara South) leh, Zomun (under Sanpui Veng VC)-te a ni.
Chakma NGO-te chuan, Mizoram sorkar thil tih dan chu Assam-in NRC an kalpui dan aiin a ṭha lo zawk nia sawiin, "Form an siam 'Proforma for identification of recent settlers within Mizoram and verification of their nationality' dahkhah ngaite dah khat turin Chakma mi za chuangte an intlar a, khua leh tui an ni tih tihchian nan voter ID, Aadhaar card, educational certificate leh tun hmaa an awm tawhna address leh thil dangte phût a ni," an ti.
Prime Minister-a memorandum an thehluha an ziah danin, Mizoram sorkarin zawhna/dahkhah tur a siam zinga paruk chu Assam sorkarin NRC a kalpuinaah telh a ni lo a; chu'ngte chu - (i) pianna khua, (ii) sakhua (religion), (iii) tun hmaa an awm tawhna khua leh an awm hmasakna khuaa an awm rei zawng, (iv) an pianna ram (native country)-a permanent address, (v) sàn zawng, sam leh mit rawng leh anmahni chhinchhiahna tur (distinguishing mark), (vi) electoral roll-a an awm theih chhan tihte a ni.
Ram dang mi man chhuak tura endik hna chu Lunglei district-a Chakma-te chenna khuaah chauh kalpui a nia sawiin, "Mizote chenna khuaah kalpui a nih ve loh avangin hei hi hnam inthliarna a ni," an ti. Chakma hruaitute chuan PM Narendra Modi chu December 22, 2019-a Ramlila ground-a a lo intiam tawhnaah ding tlang tur leh, Mizoram sorkar thil tih mek chu tihtawptir nghal turin an ngen a ni.
Chakma pawlte'n Prime Minister-a memorandum an thehluhah hian Central Young Chakma Association, Mizoram Chakma Students Union, Chakma Mahila Samity, Chakma National Council of India, Mizoram Buddhist Association leh Mizoram Chakma Alliance Against Discrimination hruaitute'n hming an ziak. Political party zingah - BJP, Congress, MNF leh National Peoples Party aiawhte'n hming an ziak bawk.