Mamawh a nih chuan MSHCS-ah pawisa dah belh zel a ni ang - CM

Mizoram State Health Care Scheme (MSHCS)-ah mamawhna a awm chuan sum an dah belh zel tur thu chief minister Zoramthanga chuan nimin khan Assembly House a hrilh.

INC member Zodintluanga'n Health minister Dr R Lalthangliana a zawhna kal zelah Zoramthanga chuan, sorkarna an chan hmasakin India rama an practise pawh an la hriat vak loh health care scheme chu ADB sum pûka an kalpui thu a sawi a, "Kha sum kha a awm char char a, kum 10 liam taah khan dah belh a awm lo. Kan sorkar khan kan han en a, cheng vbc. 150 vel a la awm," a ti.

Chief Minister chuan, MSHCS-ah hian sorkarna an chan hnuah cheng vbc. 20 an dah belh thu sawiin, "Kuminah cheng vbc. 10 dah belh leh a ni. MSHCS corpus fund-ah hian cheng vbc. 205 chuang a awm," a ti a; mamawh a nih chuan MSHCS-ah sum an dah belh zel tur thu a sawi.

Health Minister sawi danin, December 2018 khan MSHCS corpus fund-ah cheng vbc. 155.56 a awm a, January 2020-ah chuan vbc. 205.56 a awm tawh. December 2018 hnuah corpus fund dah belh a ni a, Mizoram sorkar aṭanga sum hmuh cheng vbc. 50 chu bank-ah a pung hlâwk zawk turin dah a ni.

Cheng vbc. 50-te chu bank pathumah dah a ni a; September 4, 2019 khan Yes Bank-ah cheng vbc. 20, September 11, 2019 khan MRB Khatla Branch-ah leh Chanmari branch-ah cheng vbc. 15 ve ve dah a ni.