MZU-in Convocation an hmang Mi 9,740 hnenah degree hlan a ni

Nikum khan Covid-19 léng avangin MZU hian convocation a hmang thei lo a, kuminah convocation vawi 14-na leh 15-na an hmang kawp a ni. Tun ṭum convocation-ah hian MZU chief rector PS Shreedharan Pillai, vice chancellor Prof. KRS Sambasiva Rao leh registrar Prof. Lalnundanga ten zirlai hlawhtling mi 9,740 hnenah degree an hlân.

Degree hrang hrang hlan mi 9,740 zinga 167 chu convocation-ah telin degree an dawng a; degree dawng tura convocation-a rawn tel zingah hian doctor of philosophy (Ph.D) dawng mi 98, gold medalist 63 leh book prize winner mi paruk an tel.

Governor chuan, "MZU hun rei lo te chhunga hmarchhak mai ni lo, India ram chhunga university ṭhang chak ber pawl a ni thei hi Vice Chancellor kaihhruaina ṭha tak hnuaia thawktute leh zirlaite thawh rah liau liau a ni," a ti a; MZU hmasawnna tura theihtawp chhuah­tute chungah lawmthu a sawi. 

Mizoram dung leh vâng a fan thu sawiin Larsap chuan, "Eizawnna inang lo tak takte leh dinhmun inang lo tak takte ka kâwm nual tawh. Hengah hian ka thil hmuh chhuah tâk chu, Mizoramah hian ram leilung hausakna tam tak, la hâi chhuah loh a awm a; a chhunga chêngte pawhin theihna sang an nei a ni," a ti. 

PS Sreedharan Pillai chuan, Mizoramin theihna nasa tak a neih rualin, tuna state dinhmun chu a ṭha tâwk lo hle tih sawiin, "Ei leh bàr intodelhna kawngah leh state sum thawh chhuah kawngah nasa taka ṭan lâk a ngai a ni," a ti a; degree nei thar mithiamte leh Zoram ṭhalai theihna sang tak neite chu an pên chhuah a ngaih thu a sawi.

Governor chuan, Mizoramin a nih tur ang tak thleng thei tur chuan economic development, industrialization, revenue gene­ration, employment creation-ahte nasa zawka ṭan lâk a ngaih thu sawiin, "Ṭhalai lehkhathiam rual, vawiina kal khawmte hian heng hmasawnna thlentir thei tur chuan hma an hruai a ngai a ni," a ti. 

PM Narendra Modi-a hma­thlir, 'India, ram intodelh (Atmanirbhar Bharat)' chu 'Mizoram, state intodelh'  tih nen a inmil hle tih sawiin Larsap chuan, "Mizoram hian state intodelh ber ni turin mamawh engkim a nei sa vek a, a chhunga chêng mipui pawhin theihna sang tak an nei tel a ni," a ti a; Mizoram hmasawnna tura chona awm mek chu huaisenna, taimâkna leh tumruhna nen hmachhawn a ngaih thu a sawi.

MZU hi kum 2000-a din a ni a, National Assessment and Accreditation Council (NAAC) chuan kum 2019 leh 2024 inkar atan grade A a pe. National Institution Ranking Framework (NIRF)-in India rama university ṭha a thlan zingah kum 2020 khan MZU chu 67-na a ni.