KHAWTHLIR

Vawiin hian Assembly session-ah kum 2021-22 chhunga Mizoram budget tur chu Finance changtu chief minister Zoramthanga'n a pharh dawn a, budget pharh zawhah thuthar thehdarhtute a kâwm nghal ang. Tarlan tawh angin, tun ṭum session-ah hian kum 2021-22 budget puitling pharh a ni dawn a ni. 

Additional DGP LH Shanliana, IPS chu nimin khan superanuation pension-in a chhuak a, police-ah kum 39 chhung a thawk hman a ni.

Assembly session neih mekah ZPM member VL Zaithanzama zawhna ziaka chhangin Health minister Dr R Lalthangliana chuan Mizoramah drug licence nei mi 3583 an awm thu a tarlang.

State Referral Hospital-ah Inrinni khan Covid-19 vei mi pakhat dah luh belh a ni a, nimin tlai dar 5 dinhmun angin, SRH-ah hian hripui vei vangin mi 13 enkawl mek an ni. SRH-ZMC Bulletin tarlan danin, mi 13 zinga pakhat chu ICU-ah awmin, ventilator hmantir mek a ni a, mi dang zawng Isolation ward-ah awmin, harsatna lian tham nei an awm lo. Mi 13 zingah hian kum 60 chung lam mi pahnih leh naupang kum 14 hnuai lam pathum an awm a ni.

Nimin chhun dar 12:30 vel khan Sairang Sihhmui bulah Samson Lalropuia (21) s/o Kapmawia, Ramthar Veng, Aizawl khalh bike CBR 250 leh Lalhruaitluanga (24), Chawlhhmun khalh bike CBR 150 an insú a; Samson Lalropuia chu Sairang damdawi-in panpui a nih hnuah a hliam tuar loin a thi. Lalhruaitluanga pawh a hliam avangin Sairang damdawi-in aṭangin Civil Hospital, Aizawl panpui a nia thu dawn a ni.

Lawngtlai district Agricultural Technology Management Agency (ATMA), State Agricultural Management & Extension Training Institute (SAMETI), Mizoram leh Lawngtlaia Fisheries office-te chuan February 23-27, 2021 chhung khan sangha khawi leh enkawl dan zirna an buatsaih. Mi thiamte'n sangha dil leh sangha enkawl dan chi hrang hrang an zirtir a ni.

Rural Development minister Lalruatkima chuan February 27, Inrinni khan Rurban hmanga Léng leh East Lungdar khuaa hmasawnna hnathawh hrang hrang a hawng. RD Minister hian Leng Smart Village Project te, Leng Turmeric Processing Unit leh NLCPR sum cheng nuai 434.96 hmanga sak East Lungdar  Mini Sports Complex-te a hawng a ni. East Lungdar RD block chhunga Sailulâk, Léng, Bâwktlang, Mualchéng, East Lungdar, Chekâwn, Lungchhuan, Khawlailung leh Sialsír khuatea chhungkaw 80-te hnenah tuizem litre 2,000 dawng a sem bawk.