PAHOSS hnuaiah mi 403 tan Cheng nuai 6,251 pawm tawh
Mizoram sorkarin UDPA department hmanga Aizawla Parking House Support Scheme (PAHOSS) a kalpui mekah in sak ṭanpuina dawng tur mi 403 thlan a ni tawh a, lirthei 13,758 dah theihna tur ṭanpuina sum pek tura Rs. 62,51,00,000 (nuai 6251) pawm tawhah nuai 1003.30 pek chhuah a ni tawh.
RTI Act hmanga tun hnaia zawhna, UDPA department SPIO-in February 17, 2021-a a pek chhuaha a tarlan danin, PAHOSS hnuaia lirthei dahna (garage) siamna tur sum chu a tahtawla pek a ni a, ṭum thum atan pek chhuah tawh a ni.
Pek chhuah hmasak ber first instalment-ah mi 128 hnenah cheng nuai 826 pek a ni a, a vawi hnihna (second instalment)-ah mi 40 hnenah cheng nuai 172.80 pek niin, a vawi thumnaah mi pakhat hnenah Rs. 4,50,000 pek a ni. PAHOSS hnuaia ṭanpuina pek tura thlan tawh mi 403 hnenah sum pek tur zat chu cheng nuai 6251 a ni a, cheng nuai 1,003.30 pek tawh niin, pek tur nuai 5,247.7 a la awm.
PAHOSS-ah hian ṭanpuina dilna 1,436 a lut tawh a, chu'ng aṭang chuan PAHOSS Executive Committee-in 403 a thlang tawh. Ṭanpuina dawng tawh zingah R Zosiamliana, Bawngkawn Bazar chiahin a sa zo tawh a, lirthei 15 dah theihna niin, hman ṭan a ni tawh. Ṭanpuina pek tawh mi 402 erawh chuan an la sa zo lo.
PAHOSS Executive Committee-in ṭanpuina pek tura a pawm tawh chin chu LMV 4,764 leh two wheeler 8,994 dah theihna tur a ni a, a vaiin lirthei 13,758 dah theih tura ngaih a ni.
Ṭanpuina sum pek tawh zingah ti ṭha tâwk lo an awm leh awm loh zawhna chhangin UDPA chuan, "PAHOSS diltu, Executive Committee-in a pawm tawh, pawisa pek tawh zingah ti ṭha tâwk lo, pek chhunzawm tlâk loh tun thlengin an la awm lo. Hetiang hi an awm chuan, PAHOSS guidelines-a Deed of Agreement point no. 6-in a sawi angin ṭanpuina sum an dawn tawh bakah, a pung 15% nen rûlh leh tur a ni," a ti.
SPIO chuan, PAHOSS chu February 2019-ah bul ṭan a nih thu te, Covid-19 léng avangin duh anga chaka hmalak theih a nih loh thu te, final instalment dawng thei tur mi 17 an awm thute a tarlang bawk.