'Zirna uar' pualin infuih tharna buatsaih

Central YMA chuan February 27, Inrinni zan khan Vanapa Hall-ah YMA kumpuan, 'Zirna uar' pualin infuih tharna an buatsaih a, deputy chief minister Tawnluia'n hmanpuiin, kumpuan hlawhtlinna tura CYMA buatsaih 'Kailawn' tih lehkhabu a tlangzarh.

Tawnluia chuan, kum 2019-21 chhung atana YMA-in 'Zirna uar' tih kumpuana a hmang chu ṭha a tih thu sawiin, "Kumpuan hlawhtlinna atana hriléng karah pawh YMA branch hrang hrangte'n tha thlah loin hma an lâknate leh branch tam takin zirlai harsate'n zirna an chhunzawm theihna tura chhawmdawl hna nasa taka an thawk hi a ropui hle a ni," a ti a; YMA kumpuan chuan rah ṭha a chhuah ngei a beisei thu a sawi.

Sorkarin zirna lama hmasawnna a ngaih pawimawh thu sawiin Tawnluia chuan, "Chief Minister leh Education Minister-te hmalaknain zirtirtu indaih lo lutuk phuhrûk nan kum hnih chhungin zirtirtu 1,600 zet lak a ni a, Hindi teacher pawh 540 lak a ni," a ti.

Deputy Chief Minister chuan, National Education Policy zir chiang tura sorkarin a din Study Group leh Expert Committee-te'n hnam leh sakhua mila seng luh leh hman theih dan tur an zir mek thu a sawi a; Central YMA chu zirna tluangtlam bakah, eizawnna atana pawimawh thei co-curricular activity leh kut themthiamna zirtir lamah nasa zawka hma la turin a chah.

Dy CM Tawnluia hian CYMA buatsaih, zirlaite fuih leh kaihruaitu tura Mizo mithiam 12-te thuziak dahna 'Kailawn' tih lehkhabu a tlangzarh a, a biala YMA branch hrang hrangte hnena sem turin bu 100 a lei nghal. Inkhawm senso phuhrukna atan CYMA hnenah Rs. 20,000 a pe bawk.