Chief Minister-in hnathawh tur a enfiah

Chief minister Zoramthanga chuan Inrinni khan Smart City hnuaia Chite lui ruama Chite Football Ground sak tur te, convention centre sakna tura ruahmanna an siam chhinte leh 1st MAP Parade Ground thuam ṭhatna hna thawh mekte a hmunah a en.

CM Zoramthanga chuan, Aizawl khawpui ṭhang zel tan convention centre a ṭangkai tur thu sawiin, "Chite lui ruam hi khawpui tana ṭangkai tur tak tak hmasawnna ruhrel din belhna atan remchang tak a ni. Ruahmanna ṭha tak nen chuan khawpui traffic pawh chhâwk zângkhai thei turin lirthei tlânna kawngte siam belh a, bus terminal leh shopping complex siamte pawh a remchang thei ang," a ti.

Sorkar thuchhuah tarlan danin, convention centre leh a kaihhnawih ruhrel dangte dinna tur chu Tourism Ministry hmalakna pakhat Assistance to Central Agencies for Tourism Infrastructure Development hnuaia sak tur a ni.

Convention centre atana project management consultant rawih chu WAPCOS a nia, project cost chu cheng nuai 4899 vel a ni. Auditorium, conference leh meeting hall, etc. bakah, a panna kawng te, a bul hnaia park siam te, ruahtui dawh khawlna leh a dangte a tel.

Chief Minister hi Sports minister Robert Romawia Royte, chief secretary Lalnunmawia Chuaungo, additional chief secretary JC Ramthanga, Tourism secretary Esther Lalruatkimi, Horiticulture director Elizabeth Saipari, Tourism director V Lalengmawia leh MSSC secretary John Ṭanpuia ten an ṭawiawm a ni.