Dik taka campaign turin ZPM mite chah

ZPM leader Lalduhoma chuan, Serchhip biala Assembly by-election inthlan turah Pathian leh kohhran mitmei véng chungin dik taka campaign turin ZPM mi leh sate a chah a, mimal nun pawh uluk a ngaih zual bik thu a sawi.

February 27, Inrinnia Serchhip Block ZPM-in New Serchhip Venglai YMA Hall-a political training an buatsaih a hmanpuinaah tih thu sawiin Lalduhoma chuan, "ZPM chu kalphung hrang nei kan ni a, kan danglam bik tur a ni. Mite pawh kan lakah an thîkthu a chhe bik em em. Party dangin an tih, mipuiin an nuihpui mai mai hi keini lakah chuan an nuih liampui ve thei lo. Heng hi huat tur a ni lo a, kan lakah beiseina sang tak an neih vang zawk a ni," a ti.

ZPM chu inthlanah final an thleng tih sawiin Lalduhoma chuan, "Kum 2018 leh AMC inthlanah pahnihna kan ni ve ve a, final kan thleng tihna a ni. Inthlan awm leh tur kum 2023-ah chuan mipui beisei ber kan ni a, Pathian zarah kan sorkar ngei turah kan ngai," a ti a; Mizo mipuiin rorel lai an nin tawh thu leh, rorel lai thlak nan inthlan hnuhnunga a tling teuh berte an tlin zel thu a sawi.

ZPM Leader chuan, MLA aṭanga bàn a nih chhan chu a ZPM lutuk tih vang a nih thu sawiin, "ZPM-ah hian rinawm taka awm turin ṭawngkam leh ziakin thu ka tiam a, ka thutiam ang ngeiin tun thleng hian ZPM hi ka la phatsan lo. Min bàntute hnenah pawh he thu hi chiang takin ka sawi a, min bàn lui ta tho. Sorkar khalh ngil tura Assembly House-a ṭhut ve an duh lo niin ka hria," a ti.

Lalduhoma chuan, central scheme-te chu inthlan campaign nan hman chi a nih loh thu sawiin "In sak ṭanpuina, Housing For All kan pe dawn che u, tiin mipui bum tum mek party an awm a, kum 2022-a tàwp tur PMAY-HFA(U) hi state sorkarin an duh duha an tihsaka an tihsak loh theih a ni lo, central scheme a ni a, a duh apiang tan dan anga dil theih a ni," a ti. MNF party-in Serchhip by-election-ah candidate tura an dah chu independent-a MP atana thlan tlin, a hnua party lian zawk MNF zawm ta a nih thu a sawi bawk.