Governor-in C Kamlova a lawmpui

Governor PS Sreedharan Pillai chuan Padma Shri dawng tura thlan C Kamlova, Mualpui, Aizawl chu nimin khan Raj Bhavan-a a kâwm a, chawimawina a dawn lawmpui nan thingpui a inpui bakah, thuchei leh tangkafai a pe.

PS Sreedharan Pillai chuan, India ram mipui vaibelchhe 134 chuang zingah Mizoram mi pahnihin India rama vantlang chawimawina sang an dawng thei chu ropui a tih thu leh chhuanawm a tih thu a sawi a, "C Kamlova hi hun rei tak chhung Mizote'n India rama ṭawng tlángláwn ber Hindi an thiam theihna tura nasa taka hma latu a ni," a ti.

Khawi hmunah pawh mahni pianpui ṭawng (mother tongue) a pawimawh ber tih sawiin Larsap chuan, India ram bikah chuan national language - Hindi a pawimawh thu a sawi a, "Mizo mipui pawhin Hindi thiam kan tum zel a ngai a ni," a ti a; C Kamlova chu thuziah lam chhunzawm zel tur leh Mizo thu leh hla pawimawhte Hindi-a lehlina tihchhuah kawngah theihtawp chhuah chhunzawm turin a fuih.

C Kamlova chuan, Padma Shri dawn chu a suangtuah ngai loh leh beisei loh a nih thu sawiin, Governor-in a lawmpui chu thinlung taka a lawm thu a sawi a; Hindi ṭawnga hnam inpumkhatna kawngah a theih anga hma lak chhunzawm zel a tum thu a sawi bawk. C Kamlova hian Governor hnenah a lehkhabu ziah pali a pe nghal a ni.

C Kamlova hi November 17, 1948-ah Mampui khua, Lawngtlai district-ah a piang a, pawl 6 a pass hnuah sipaiah a ṭang. Sipai aṭanga a chawlh hnuah lehkha (private-in) zir tha lehin, Hindi-ah M.A leh M.Ed. thlengin a zo a; sikulah Hindi zirtirtu hna a thawk bawk.

Mizo ṭawng thu leh hla eng emaw zat chu Hindi-in a let a, kum 1995-ah MBSE-in a ruat angin pawl 6 Hindi zirlaibu 'Zoram Bharti' a siam. Kum 2000-ah thumal 29,000 chuang awmna Hindi-Mizo Dictionary a chhuah a, Hindi-Mizo Dictionary siam avang hian Ministry of Human Resource Development chuan Rs. 1,00,000 keng chawimawina National Honour Award a hlan a ni.