Aizawlah kawng chhâwng siam ngei tum a nih thu session-ah sawi lan a ni

Nimina Assembly session-ah UDPA changtu deputy chief minister Tawnluia chuan, Kulikawn leh Bawngkawn inkarah kawng chhâwng siam an la tum reng thu House a hrilh. Chief minister Zoramthanga pawhin, kawng chhâwng atan mithiamte DPR an la siamtir tura a ngaih thu a sawi bawk.

ZPM member C Lalsawivunga zawhna kal zelah Chief Minister chuan, Bawngkawn leh Vaivakawna flyover siamna tur leh Chaltlanga inter-state bus terminal siamna atan sorkar laipuiin a thuphungin (in principal) pawmpuina a pek tawh thu a sawi a, "Flyover pahnih hi kawng chhâwng nena inzawm remchang tura design a ni. Kawng chhâwng hi a tluana kan tih chuan hun a duh rei dawn si a, Bawngkawn leh Vaivakawn hi a ring rêk buai lai a ni a, a emergency bik, a hmasain ti phawt ila kan ti a ni," a ti.

CM Zoramthanga chuan, kawng chhâwng atan DPR emaw, thil dang emaw an la tih loh thu sawiin, "Mithiamte DPR kan la tihtir turah ka ngai. Ka mimal ngaihdan chuan, main line Chanmari to Kulikawn hi chu a awlsam, Bawngkawn lam kaltlangtir turin Chaltlang khâmah chuan kaltir chi a ni si lo. Ramhlun venga a rêk lai, lung tohlâwt lai saw ka huphurh khawp mai. A remchang lai apiangah luh leh chhuahna siam tur a ni," a ti a; luh leh chhuahna siam chu Mizo­ramah chuan a sang aṭanga rawn fin, zàr zawm mai theih a nih vangin a awlsam thu a sawi.

C Lalsawivunga'n, kawng chhâwng siamna turah project siam a nih tawh leh tawh loh leh kilometre zat a zawhna chhangin Tawnluia chuan, "Bawngkawn leh Vaivakawnah flyover siam turin hmalak mek a ni. Ministry of Housing & Urban Affairs-in principle approval a pek angin feasibility study neih mek a ni. Feasibility study neih mek a nih avangin a kilometre zat hriat a la ni lo. Techno-feasibility report peih a nih hma chuan a siamna hmanrua tur sawi theih a ni lo," a ti. Flyover ni lo, kawng chhâwng chungchang zawhna chhangin Tawnluia chuan, Kulikawn leh Bawngkawn inkarah tal chuan kawng chhâwng siam an la tum reng thu House a hrilh a ni.