Health Minister-in screening point a tlawh

Health & Family Welfare minister Dr R Lalthangliana chuan February 27, Inrinni khan Mizoram kawtchhuah, Bairabi leh Vairengtea Covid-19 screening point te, Bairabi Zophaia Mizoram Police border out post leh Vairengte leh Lailapur inkara BSF duty-na hmunte a tlawh.

Health Minister hi Bairabi-a Covid-19 screening point a tlawhnaah hian Bairabi khawtlang hruaitute leh screening point-a duty-te'n an lo dawngsawng a; an mamawh leh harsatna an lo thlente chu a theih ang anga chinfel nghal a nih tur thu sawiin, a ṭula an hman atan Rs. 10,000 a hlân. Bairabi screening point-ah hian volunteer 10 duty turin an inpe a, volunteer pakua an duty mek a ni.

Bairabi screening point a tlawh zawhah Dr R Lalthangliana chuan Zophai border outpost-a duty police-te a tlawh a; Mizoram him theihna tura an inpekna chu Mizoram mipuiin an thlamuanpui tih hrilhin, an mamawh zualpuia an hman atan Rs. 10,000 a hlân.

Health Minister hi Vairengtea Covid-19 screening point a tlawhnaah bialtu MLA Lalrinsanga Ralte hoin  khawtlang hruaitute leh screening point-a duty-te'n an lo hmuak a, an mamawh leh harsatnate an lo thlen.

R Lalthangliana chuan, Mizoram luhkaa screening point hrang hrangte sorkarin a ngaih pawimawh thu sawiin, "A thawktute indaih lohna leh screening point tihchangtlun dan kan ngaihtuah mek a ni," a ti a; an mamawha hman turin Rs. 10,000 a hlân. Vairengte screening point-ah hian volunteer-te telin mi 18 duty an awm mek a, hlâwm hnihah inṭhenin, ni tin darkar 12 ve ve an duty chhâwk ṭhin.

Health Minister hian Vairengte CHC, Bairabi PHC, Bilkhawthlir PHC, Kawnpui PHC, Lungdai PHC leh Thingdawl Sub-Centre te a tlawh bawk a; MLA pahnih - Health & Family Welfare Board vice chairman Dr ZR Thiamsanga leh Dr K Pachhunga bakah, Health department official-te'n an ṭawiawm a ni.