COVID-19: Mizoram dinhmun Hripui vei mi 4 hmuh belh a ni
February 26-27, Zirtawpni leh Inrinni khan Mizoramah Covid-19 vei mi pali hmuh chhuah a ni a, an zinga pathum chu tualchhunga hri kái niin, natna (symptom) lang pahnih an awm. Inrinni leh nimin khan hripui laka fihlim tawh mi pasarih chhuahtir an ni.
Covid-19 vei Zirtawpnia hmuh chhuah mi pathumte chu RAT hmanga hmuh an ni a; ZMC laboratory leh TrueNAT-PCR hmangin hripui vei hmuh chhuah a ni lo. Inrinnia hmuh belh mi pakhat chu TrueNAT-PCR hmanga Champhaia hmuh chhuah a ni a, ZMC leh RAT hmanga endik zingah hripui vei an awm lo.
Inrinni khan hripui laka fihlim tawh mi pahnih chu Lawngtlai CCC aṭangin chhuahtir an ni a; nimin khan Lawngtlai CCC aṭangin mi pali leh Champhai CCC aṭangin mi pakhat an chhuak bawk.
Mizoramah Covid-19 vei mi 4,423 hmuh chhuah a ni tawh a, mipa 3,228 leh hmeichhia 1,195 an ni. Nimin tlai dar 5 thleng khan mi 4,393 (99.32%) chhuahtir an ni tawh a, mi 10 (0.23%) thi tawhin, enkawl mek mi 20 (0.45%) an awm.
February 26, Zirtawpni khan ZMC laboratory-ah swab sample 11, TrueNAT-PCR hmangin district pathumah sample 14 leh RAT hmangin district 11-ah sample 951 endik a ni a; sample endik zawng zawng chu 976 niin, chu'ng aṭanga Covid-19 positive hmuh chhuah pathum chu 0.31% a ni.
Inrinni khan ZMC laboratory-ah swab sample 28, TrueNAT-PCR hmangin district pathumah sample 31 leh RAT hmangin district pariatah sample 605 endik a ni a; sample endik zawng zawng chu 664 niin, chu'ng aṭanga Covid-19 positive hmuh chhuah pakhat chu 0.15% a ni.
February 27, 2021 thlenga Mizorama swab sample endik tawh zat chu 2,32,060 a ni a, chu'ng aṭanga Covid-19 positive mi 4,423 chu 1.91% a ni. Hripui vei hmuh tawh zinga mi 2,109 chu Mizoram chhunga kái chhâwng an ni a, mi 2,314 chu Mizoram páwn aṭanga an rawn luh hnua hmuh chhuah an ni thung.
District 11 zinga district panga - Siaha, Kolasib, Serchhip, Khawzawl leh Hnahthial district-ahte Covid-19 vei an awm tawh rih lo.
February 26-a hmuh chhuah
Mission Vengthlang - 2: Nupa kum 40 leh 31, hri kaina hriat loh. Pa zawk private hospital-a inentir tura a kalnaah hripui a vei tih hmuh a ni a, symptom a nei; nu zawkin symptom a nei lo.
Kanhmun - 1: Hmeichhia kum 88, Tripura aṭanga haw, Kanhmun screening point-a hmuh chhuah, symptom nei.
February 27-a hmuh chhuah
Champhai Venglai - 1: Hmeichhia kum 74, tualchhunga kái, kàina hriat, symptom nei lo.