Faina Kûtpuiah lawmman hlan a ni

PHE department chuan nimin khan Vanapa Hall-ah Faina Kûtpui (Swachh Mahotsav) 2019 an hmang a, Home minister Lalchamliana'n a hmanpui. Faina leh thianghlimna lama thawk ṭha ber - district bawrhsap, mimal/chhungkua leh district tina thawk ṭha ber khuate hnenah lawmman hlan a ni.

Faina Kûtpui hi sorkar laipuia Ministry of Jal Shakti ruahman anga hman a ni. Minister Lalchamliana chuan, faina leh thianghlimna tluantling nei turin mi tinte'n tui kham khawp an neih a pawimawh thu sawiin, "Tui kham khawp nei turin sorkarin ṭan a la mek zel. Tui hnár ram leh tuihnate venhim a pawimawh," a ti a, thlen chin aṭanga hma sawn zel turin mi tinin ṭan an lak a pawimawh thu a sawi.

Lalchamliana chuan, Mizoram chu kum 2018 khan páwn lama inthiar awm lohna, open defecation free (ODF) state-ah puan ani tawh tih sawiin, "Mizoram hi India rama state 29 zingah ODF state 14-na a ni a, he dinhmun luah renga hma lam pan zel turin kan ṭan tlan a ngai a ni," a ti.

Faina Kûtpui hmannaah hian lawmman chi hrang hrang sem a ni a; district bawrhsap zinga faina leh thianghlimna lama thawk ṭha ber atan Aizawl DC Vanlalngaihsaka thlan a ni. Mimal/chhungkaw mala ek-in fai, thianghlim leh mawi ber thlannaah Biaktluangi, Melriat, Aizawl district chu thlan a ni bawk.

#    DC Hming    District

1.    Vanlalngaihsaka, IAS    Aizawl

2.    Dr Naveen Aggarwal, IAS    Champhai

3.    Sangchin Chinzah, MCS    Serchhip

Mimal/chhungkua ek-in fai leh mawi

#    Hming    Khua

1.    Biaktluangi    Melriat

2.    S Biakchungnunga    Saichal

3.    Lianchuailova    NE Khawdungsei

Faina leh thianghlimnaa V/C thawk ṭha

#    District    Dawngtu V/C

1.    Aizawl    Maubuang

2.    Champhai    Pàwlráng

3.    Kolasib    Lungdai

4.    Lunglei    Ṭawipui North-II

5.    Lawngtlai    Kawrthindéng

6.    Mamit    Kawrtethawveng

7.    Siaha    Siatlai

8.    Serchhip    Sailulâk