MoU anga hna thawh lohna MoU-te tihtawp vek tum a ni

Power & Electricity minister R Lal­zirliana chuan nimin Assembly session-ah zawhna chhangin, Mizoram sorkarin hydel project siam tura memo­randum of understanding (MoU) a ziahpui company-te'n hna an thawh loh chuan MoU tihtawp vek tum a nih thu a sawi.

ZPM member Lalduhoma zawhna chhangin P&E Minister chuan, Mizoram leh NTCP-te'n Kolodyne Stage-II HEP thawk tura MoU an ziah chu NTPC-in hma an lak zui loh avangin MoU tihtawp a nih loh chhan tur ziaka thehlut turin sorkarin a hriattir tih a sawi a, "An chhanna nghah mek a ni," a ti.

Opposition group leader Lalduhoma chuan, hydel project siam turin Mizoram sorkarin company pakua MoU a ziahpui tih sawiin, "An vaiin an zawh hun tur a pêl vek a, hna pawh an la thawk lo vek a ni," a ti a; MoU tihtawp a, agreement thar siam tumna a awm leh awm loh a zawt a ni.

R Lalzirliana chuan, MoU ziah tawh a nih chuan company-te Court-ah an zualko theih thu sawiin, "Sawi tur an neih leh neih loh zawh phawt a ngai a, kan zawt vek ang. MoU anga hnathawh a nih loh chuan MoU-te tihtawp vek kan tum," a ti.

ZPM member C Lalsawivunga zawhna chhangin P&E Minister chuan tun dinhmunah Mizoramin kawlphetha a mamawh san lai berin Mw. 140 vel leh a mamawh tlem lai berin Mw. 45 vel a ma­mawh thu a tarlang a, "State dang aṭanga power lei ṭhin zat chu a tlangpuiin Mw. 70 vel a ni," a ti a, Mw. 120 vel thlenga lei chang pawh a awm thu House a hrilh.