KHAWTHLIR

Kristian Ṭhalai Pawl (KṬP) member ni thei chin kum zat tihdanglam a ni a, kum 15 aṭanga kum 40 inkar a ni tawh dawn. KṬP member-ni thei chin kum zat hi hun rei tak chhung chu kum 14-40 a ni a; nikuma KṬP Inkaihhruaina ennawnah kum 15-40 inkar ni tura rawt niin, February 2020-a Synod Executive Committee ṭhukhawm chuan a pawmpui a ni. KṬP member ni thei chin kum tihdanglam (15-40) hi kum 2021-ah hman ṭan a ni ang.

CID (Crime) hnuaia Investigation Wing din thar chu nimin khan DGP SBK Singh-a'n a hawng a; thawktu mi pasarih - inspector pahnih, sub-inspector pahnih leh, assistant sub-inspector, head constable leh constable pakhat 

ṭheuh an awm. Investigation Wing hnathawh tur tlangpui chu - Mizorama thubuai lian tham - bomb puak, tualthahna, pawngsual, Intellectual Property Right bawh­chhiatna, economic crime cheng nuai 500 chin, pawisa lem leh mihringa sumdawnna, insuam leh, thubuai lian tham, thuneitute'n chhui ngai an tihte an bawhzui ṭhin dawn a ni.

Aizawl DC chuan thupek chhuahin, lehkhachaih chaih nan nylon emaw, la (string) emaw tih­hriam chite chu mihring leh ran hriselna atan a pawi theih avangin hman phal a nih loh thu leh kháwl lâ (cotton) pang­ngai chauh hman phal a nih thu a tarlang. Thupek hi National Green Tribunal-in Mizoram sorkar hnena hriattirna a pek anga chhuah a ni a; thupek zâwm lote chu IPC Section 188 hmang­in hrem theih an ni.

Cod Nerc-in NABARD bultuma Vanapa Hall-a Grassroot Product Marketing (Buyer Seller Meet) an buatsaih chu March 2, Thawhṭanni khan chhunzawma zawh a ni a, Reserve Bank of India general manager Mary Deng-i'n a kharna inkhawm a hmanpui. Buyer Seller Meet-ah hian Ramlai Handloom, Thenzawl puantah leh thil siam chhuah te, Kawnpui Farmer Club thil thar leh siam chhuah te, Aizawla entrepreneur ṭhenkhatte thil siamte pho lan a ni.