Duhoma'n oil palm chingtute harsatna Sukiang turin Mizoram sorkar a ngen

Opposition group leader Lalduhoma chuan nimin Assembly session-ah motion a pu lut a; red oil palm chíngtute harsatna sukiang turin sorkar a ngen. Chief minister Zoramthanga chuan, oil palm-a harsatna chu zir chian a nih tur thu a sawi.

Lalduhoma chuan, Mizoram sorkarin red oil palm lei turin company pathumte inremna a ziahpui thu sawiin, "July 24, 2009 leh November 7, 2012 ah Godrej Agrovet Ltd., Mumbai nen agreement siamin, Kolasib leh Mamit district a huam. December 4, 2009 leh August 1, 2012-ah Oil Palm Agrotech Pvt. Ltd., Hyderbad nen agreement an siam a, hei hi Lawngtlai district huam tur a ni. October 30, 2006-a agreement an siampui Ruchi Soya Industries Ltd., Mumbai nen agreement siamin, hei hian Lunglei district a huam a ni," a ti.

Lawngtlai leh Lunglei district tana agreement an ziahpuite'n ṭhangkhat lian a ral hnuah pawh red oil palm herna tur khawl an la bun lo tih sawiin Lalduhoma chuan, "Sum tam tak pek an ni tawh. An nungchang han thlir hian khawl din an tum tak tak lo niin a lang. Lawngtlai leh Lunglei district chhunga red oil palm chíngtute tan chuan a beidawnthlak ta hle a ni," a ti a; factory din awmchhun chu Godrej Agrovet chauh an nih thu a sawi.

Lalduhoma sawi danin, Godrej Agrovet chuan Bukvannei-ah factory (oil palm mill) an din a, an khawlin darkar khatah metric ton 5 a her thei a, her tur duh tâwka tam an hmuh loh avangin a khawl capacity 30% chauh a hmang. Company leh loneitute'n harsatna an neih chinfel ngaite chu - a hunah a chi supply a ni lo te, natna hrik bakah bui leh sanghalte'n an duh hle a, tam tak a tihchhiatsak ṭhin te, leiṭha an hmu ṭha lo te, tui an nei ṭha lo te, sum leh paia ṭanpuina an dawng tlai lutuk te, leilawn leh blade an nei lote leh link road a ṭha lote a ni.

Red oil palm chu a chìnna tur hmun bik (compact area) siam a nih loh thu sawiin Duhoma chuan, "MIP leh NLUP hnuaiah hmun tinréngah chìntir a ni. A rah hi lawh aṭanga darkar 12 chhungin factory-ah phurh thlen hman a ngai. Factory awm rêng rêng lohnaah chìntir an ni a, link road a ṭha lo a, transport subsidy pek a ni bawk si lo a, farmer-te'n tihṭawih an ngah lo thei lo. Chhungkaw tam tak an thawkrim thlàwn a, an chhiatpui ta a ni. Factory neitute tan lah

duh ang tâwk her tur an hmuh loh avangin hlohna a ni ve bawk," a ti.

Chief minister Zoramthanga chuan, thar chhuah a ṭhat beiseiin thlaite chìntir an nih ṭhin thu sawiin, "Fuh lo deuh leh fuh deuhte a awm ṭhin. A production lam, transportation lam, market lam leh thil dangte thlir chungin zir chian a ngai. A ṭha lo a nih chuan kalsan a, a aia ṭhaa thlak mai tur a ni," a ti a; a ṭha lo chu kalpui reng a ngaih loh thu a sawi.

Agriculture minister C Lalrinsanga pawhin, oil palm chíngtute harsatnate sukiang turin a theih ang anga hmalak zel an tum thu sawiin, "Tunah hian kawng hrang hranga oil palm chíngtute dinhmun enfiahin AMFU nen survey kan nei mek. Heng hmalakna aṭang hian ruahmanna thar siam theih tura beisei a ni," a ti.