Zirtirtu lâkah Hnam Rûn list a awm lo - School Education Minister

School Education minister Lalchhandama Ralte chuan, Mizoram sorkarin muster roll-a thawk tur primary school leh middle school zirtirtu 881 lak turah Hnam Rûn list a awm lo a, thingtlang thleng phak 'Education Gospel' kalpui an tum thu a sawi.

Nimina Mizo Hnam Rûna inkhawmah thu sawiin Lalchhandama Ralte chuan, "Tun hnaia MR-a zirtirtu 881 lak turah Hnam Rûn list a awm lo. Thingtlang thleng phak Education Gospel kalpui kan tum a, thingtlang lama zirtirtu nei lote leh indaih lohna nasa tak phuhru turin hma kan la a ni. Opposition party lamin zirtirna him lo mipui an zirtir a, party mi leh duh duh la tur angin an zirtir a, hei hi a ṭha lo hle.

"Open takin kan kal dan tur zawng zawng kan puang a, zirtirtu train chhuak thlap, a khaw mi emaw, khaw ṭhenawm, an thawhna hmuna awm ṭha duh tur lak tumin kan inbuatsaih. Transfer dil lo tur, thiam si, a khaw mi lak kan tum a ni," a ti.

Education Minister chuan, Lawngtlai district leh Siaha district tih loh district tinah Departmental Promotion Committee (DPC) kaltlangin zirtirtu lakna neih a ni dawn tih sawiin, "Board chairman atan DC niin, secretary atan DEO a ni ang a, member atan district tina DIET principal, SDEO senior ber an ni bawk ang. He mi monitor tur hian DPAR aiawh pakhat ṭheuh an ṭhu tel dawn bawk. District tinah hna lakte hi an final nghal vek dawn a, minister dawhkânah emaw, director dawhkânah emaw final tur a ni lo," a ti a; Chief Minister-in Education department chu ngaih pawimawh bika a neih thu a sawi.

Lalchhandama Ralte chuan, Mizote nunphung milin sikul kai hun an thlak danglam thu te, Mizorama kum nga vel hman tawh Continuous and Comprehensive Evaluation (CCE) chu Mizote'n an thiampui chiah loh avangin academic session kal mek (April 2019) aṭangin CCE kalphung an her danglam a, term exam angin vawi thum exam kalpui a nih thute a sawi a, "CCE modified form kan hmang a ni. Zirtirtu transfer and posting rules siam ṭul kan ti a, a hmáwr kan bâwk thei titih tawh a ni," a ti.

Education Minister chuan, inthlahdah vanga aikal late chungah action lak a nih tur thu sawiin, "Khawtlang leh sorkar pawhin a pawm cancer natna leh dinhmun khirh bik ni loa aikal late chungah action lak a ni dawn," a ti a; chutiang tur chuan RMSA leh SSA-ah pawh ngenna siam a nih thu a sawi. Education minister chuan, sikul endik (inspection) uar ṭul an tih avangin a hmunah ngei sikul enfiah ṭhin tur a nih thu a sawi bawk.