MNF sorkar hian term an hmang ral dawn lo - Lal Thanhawla

Mizoram Pradesh Congress Committee (MPCC) president Lal Thanhawla chuan nimin khan Congress Bhavan-ah thu a sawi a, "MNF sorkar hian an term an hmang ral dawn lo a, eirukna sual avangin tla thei reng dinhmunah a ding mek a ni," a ti.

MPCC president atana thlan nawn hlim Lal Thanhawla chuan, MNF hotupa tiamin MNF hruaitu lawkte'n eiruk thubuai pahnih pathum an nei tih sawiin, "Lung-in táng thei reng an ni. Congress party inthlan buaipui tura ruat college zirtirtu tam tak an phûr dan enin a mak ka ti hle a ni," a ti a; college zirtirtute chuan Congress party a tho leh vat dawn tih an hrilh thu a sawi.

MNF sorkar hmasak kum 1998-2008 inkar chhungin contractor ho hnen aṭangin 3% an la ṭhin tih sawiin Lal Thanhawla chuan, "Congress sorkar chhung kha chuan Congress mipuite hmangin Mizoramah malsawmna tam tak a thleng a, Congress party aia hmasawnna thlentir nasa an la awm lo. Congress mipui vangin Mizoramah remna leh muanna a awm a ni," a ti.

MPCC treasurer thar Zodintluanga Ralte pawhin thu sawiin, MNF sorkar tharin Mizoram budget an siam dan te, Supreme Court thuchhuak palzût chunga muster roll-a zirtirtu lak an tum dan te, Mizo ṭhalai lehkhathiamte hmangaih miah loa MPSC thuneihna an chhuhsak dan te, an kutchhuak ni miah lo MIMER hming an thlak dante ngaihtuahin, Mizoram hmangaihtu dik takte tan chuan MNF sorkar kal dan chu ngawihpui mai chi a nih loh thu a sawi.

Zodintluanga chuan, chief minister Zoramthanga chu a kalna apiangah ṭhalaite nuihzat a ni mek tih sawiin, "Social media-ah kan ṭhalaite'n a thusawi lai video an en a, an nuih a za ṭhin, chhungkaw group-ah tak ngial pawh nuihzat a hlawh mek a ni. Mizoram an sawp chhiat vek hmain MNF sorkar hi kan paihthlak a ngai a, chu chu khua leh tui ṭhate tih tur pawh niin a lang," a ti a; ṭhalaite nuihzat chief minister neih chu vanduaithlak a tih thu a sawi.

Aizawl District Congress Committee (ADCC) president thar Vanlalzuiliana chuan, mipui chàn loh khàna chhuak sorkar Mizoramin a hrawn mek nia sawiin, MNF chu mipuite'n sorkar siam turin an beisei lo niin a sawi a, "Congress party hi kan tho leh dawn. ADCC pawh kan hotute remtihpuinain kan insiam thar ang a, theihtawp kan chhuah ang. Tla mah ila kan ngui lo, kan tang hrá mai a ni," a ti.