Bawngkawnah lei minin kawng a hnawh ping

July 25, Ningani zan khan Bawngkawn Aizawl-Lunglei road kawng chhakah lei a min a, NH-54 kawngpui a hnawh ping vek a, tun thlengin thenfai theih a la ni lo.

Thu dawn danin, Bawngkawna leiminnaah hian Ningani zan tîr lam khan nasa vak loin lei a min a, zanlai pelh tawh, nimin zing dar 2:30 vel khan nasa zawkin a min leh a ni. Leimin hian kawngpui a hnawh vek a, a thlang lama in ṭhenkhat pawh a deng a, mihring thi leh hliam erawh an awm lo.

PWD engineer-in-chief K Lalsawmvela'n Vanglaini palai zawhna chhanga a sawi danin, kawngpui hnawhtu leimin hi nimin khan PWD-in then tum mah se, tlem tlema a la min reng avangin chet a harsa deuh a, nimin tlai lam thleng khan a thenfai hna an la thawk mang lo. Kawngpui hi lirthei tlan theiha a tlang hun tur an sawi thei rih lo a ni.

Bawngkawna NH-54 ping vang hian lirthei tlan dan tihdanglam a ni a; Bawngkawn aṭangin Ṭhuampui lam panin Bawngkawng Presbyterian biak-in - Ṭhuampui helipad kawngah two wheeler-te tlan theih a ni a, LMV leh a aia liante chu Durtlang Leitan leh Zuangtui lam aṭangin tlan theih a ni.

Ṭhuampui aṭanga Bawngkawn lam pan turte chu Zuangtui leh Durtlang lamah kual tur a ni a, Falkland Veng aṭangin Chite kawng lamah a tlan theih bawk a, mahse, 407 truck leh a aia liante tlan theih a ni lo. Hetih lai hian, July 19, 2019-a Mualkhang dáia leimin nasa takin kawngpui a hnawh pin chu lirthei kaltlang theihin siam tlang ni tawh mah se, ruah a sur avangin a nâl a, nimin lam khan lirtheite tan kaltlang a harsa hle a; vawiin lamah ruah a sûr chhunzawm loh chuan lirthei tangkhangte tlân tlangtir theih an beisei.