Mizoram hmeichhe football team lawmpuina hun hmang Football hi hnam inpumkhatna hmanrua a ni - Sports Minister

Assam Rifles 23 Sector Headquarters bultumin nimin khan Lammual chhak tlanga 46 AR hmunah tun hnaia NES Under-19 Women Football Championship-a champion Mizoram team chawimawi hun hman a ni a, Sports & Youth Services minister Robert Romawia Royte leh Mizoram Football Association (MFA) hruaitute'n an hmanpui.

SYS minister chuan football chu hnam inpum-khatna hmanraw ṭha tak a nih thu a sawi. Robert Romawia chuan, Mizoram hmeichhe U-19 team-te India hmarchhaka  an champion chu a lawmpui thu sawiin, "He hnehna hi sorkar ta emaw, a buatsaihtu AR ta emaw, MFA ta emaw a ni lo a, Mizoram mipui zawng zawng ta a ni," a ti.

Sports Minister chuan, MFA-in football hmasawmna atana hma a laknate chu sorkar pawhin belhchhaha tichak tura hma a lak zel tur thu sawiin, sorkar leh MFA thawhona ṭha tak chu chhunzawm turin MFA hruaitute a sáwm. MFA hnathawh ṭhat avanga FIFA-in Sairang Dinthara artificial ground an siamsak mek chu a lawmpui thu leh, a tihhlawhtlin leh tihchangtlun kawngah Sports minister a nih anga theihtawp chhuahpui a inhuam thu a sawi.

Football chu hnam impumkhatna hmanrua a nih thu sawiin, "Football avangin hmarchhak state leh India hmun dangte kan inpawh ṭha leh zual a, inunauna boruak ṭha zawk siamin hnam inpumkhatna a tichak a, football thiltihtheihna hi a ropui a ni," a ti.

Robert Romawia Royte chuan Rajiv Gandhi Stadium chu international level match thleng thei turin flood light an siam mek thu a sawi a; Aizawlah football  khelmual dang pali/panga vel siamna tur hmun dap mek a nih thu te, Zemabawk khelmualah phûl lem phah a nih tur thu leh, Khawzawl khelmualah pawh phûl lem phahna tur an kalpui mek thu a sawi.

Mizo hmeichhe football team chawimawinaah hian AR 23 Sector hotupa Brig. Vinod S chuan thusawiin, he hlawhtlinna hi AR leh Mizo mipuite inunauna tiṭha zualtu a nih zel a beisei thu a sawi. MFA president Lal Thanzara chuan AR nen boruak ṭha tak an neih avangin lawmthu a sawi a, MFA-in hmasawn zel turin sorkar chakna a mamawh thu leh  sorkar nen ṭha taka an thawh  dun avangin sorkar chungah lawmthu a sawi bawk.

Directorate General Assam Rifles (DGAR)-in Diphu leh Kohima-ahte July 17-21, 2019 chhunga North East States U-19 Girls Football Championship an buatsaihah Mizoram team hian final-ah Sikkim 3-0 a hnehin an champion a ni.