KHAWTHLIR

Government Aizawl College NSS unit chuan nimin khan an college-ah blood donation camp an huaihawt a, Aizawl Civil Hospital tan thisen unit 192 an pe a, a petute mipa 153 leh hmeichhia 39 an ni. Bilkhawthlir Kawnveng Branch YMA pawhin an khuaah Kolasib District Hospital tan thisen unit 32 an pe a, a petute mipa 17 leh hmeichhia 15 an ni.

Aizawl South-II bialtu MLA Lalchhuanthanga chuan nimin khan Mission Veng Bazar chhuk thla, Synod Bookroom leh Thakthing Veng pênna inkar kawngpui sír kea kalna (footpath) siamṭhat dan tur chu Mission Veng Local Council-te nen an en. Footpath hi hun rei tak thawm ṭhat loh a nih tawh avangin a chhe lai a awm nual tawh a, chuvang chuan Mission Veng LC chuan bialtu MLA nen ṭanghoin siamṭhat dan tur an ruahman a ni.

Aizawl District Monitoring Committee on Accessible Election chu nimin khan Aizawl DC Conference Hall-ah an ṭhu a; Election Commission of India-in Mizoram inthlanpui hnuhnung bera Acessible Elections chungchanga report a dil chu an sawiho. Meeting hi additional DC VL Hruaizela Khiangte-in a kaihruai a, election officer pahnih Lalfakzuala, Accessible Elections nodal officer Josephine Zonunsangi, Aizawl district CDPO te, District Icon for PwD, Aizawl-te leh tlawmngai pawl hruaite'n report an pe a ni.

Tourism minister Robert Romawia Royte kaihhruaiin Anthurium Festival Organising Committee chu nimin khan minister pisaah an ṭhukhawm a; October 4-5, 2019 chhungin Reiekah Anthurium Festival hman leh an rél. Meeting-ah hian govt. deputy chief whip Lalrintluanga Sailo, MLA bakah, sorkar department hrang hrang, MJA leh Anthurium Grower's Association aiawhte an tel a ni.