Central university ranking-ah MZU 12-na

Outlook-ICARE ten tun hnaia India rama cen­tral university ranking a tihchhuahah Mizoram Uni­versity (MZU) chu 12-na a ni. India hmarchhak state-a central university zingah pathumna a ni thung.

Outlook-ICARE hian India rama university-te chu tehna hrang hrang hmanga tehin, a ṭhat dan indawt (ranking) an tichhuak ṭhin a; chu chu July 18, 2019 khan tichhuah a ni. University ṭhat dan zir chiannaa an tehna tlangpuite chu - faculty student ratio (zirtirtu leh zirlai zat), faculty with Ph.D. (zirtirtu zinga Ph.D nei awm dan), papers per faculty, citations per paper leh inclusiveness & diversity-te a ni a; tehna chi hrang hranga an point-te belhkhawm a nih hnua a point sang apiangte chu university ṭha tehnaa a sangte an ni.

Central university ṭha thlannaah hian pakhatna, pathumna leh palinate chu Delhi khawpuia mi vek an ni a; pakhatna chu Delhi University niin, Banaras Hindu University, Varanasi-in a dawt. Pathumna chu Jamia Millia Islamia, New Delhi a ni a, Jawaharlal Nehru University (JNU) chu palina niin, University of Hyderabad-in a dawt leh bawk.

India hmarchhak state-a central university zinga ṭha ber chu Tezpur University, Tezpur, Assam niin, India ram pumah pasarihna a ni a; North Eastren Hill University (NEHU), Shillong chu pariatna a ni. University ṭha zual 20 zingah India hmarchhak state aṭangin Assam University, Silchar (14-na), Rajiv Gandhi University, Itanagar, Arunachal Pradesh (15-na), Nagaland University (18-na) leh Manipur University (19-na)-te an lang bawk. Central university ṭha zual 20 zingah hmarchhak bial aṭangin university pasarih an lang a ni.

MZU hi India Today leh an thurualpuite'n general line (course) zirna bika kumina India rama university ṭha an tehnaah university ṭha 21-na a lo ni tawh bawk a, chutah chuan Jawaharlal Nehru University, New Delhi chu university 

ṭha ber a ni. Kum thum kal ta chhunga thil thar an hauh (patent) zat tam lamah MZU chu pathumna a ni tawh bawk.