Sipaite'n Kargil Vijay Diwas an hmang mek

India rama sipaite chuan tunlai hian kum 20 kal taa Kargil War-a hnehna chan champha hriatrengna hun, Kargil Vijay Diwas (Kargil War Victory) an hmang mek a; 'Run for Martyr' te leh zirlai/ṭhalaite zingah ralthuam entirna hunte an buatsaih ṭhin.

Border Security Force (BSF) 61 Battalion chuan Kargil War Victory champha vawi 20-na pual hian tun hnai khan Lunglei Zotlang aṭangin 'Run for Martyr' an buatsaih a, mi eng emaw zat telin, km. 5-a thui an tlân. Serchhip Dawngzawla awm BSF battalion headquarters pawhin July 23 khan Run for Martyr huaihawtin, km. 5-a thui an tlan a, BSF sipaite bakah ṭhalaite leh zirlaite an tel. Run for Martyr-a telte hian Kargil indonaa thite hriatrengna thuziak chi hrang hrang an keng a ni.

Kargil Vijay Diwas hi BSF Border Out Post hrang hrang - Jagnasuri, Parva leh hmun dangahte pawh hman a ni a; hmun ṭhenkhatah chuan a thlawna inentirna buat­saih a ni. Kargil War Victory hi July 20, 2019 khan hman ṭan a ni a, vawiinah khâr a ni ang.