Aizawlah Power Walk huaihawt

Mizoram State Commission for Women (MSCW) chuan March 2, Thawhṭanni zan khan Aizawlah Power Walk an buatsaih a; mi eng emaw zat telin, hmeichhiate tana himna pawimawhzia an tarlang.

National Commission for Women (NCW) chuan India rama state hrang hranga Power Walk neih hun atan March 1 zan dar 7-8 a ruat a, Pathian­ni zan a nih avangin MSCW chuan Thawhṭanni zan khan an hmang. Power Walk kawngzawh hawnna inkhawm chu Millennium Centre kawtah neih niin, Aizawl bishop Most Rev. Stephen Rotluanga'n ṭawngṭaiin a thlah a; Vanapa Hall kawt thleng kawng zawhin, a khàrna inkhawm hman leh a ni.

NCW-in Power Walk a huaihawt chhan chu - hmeichhiate dikna leh chanvo humhalhna tura hmalak a ni a; khawpui kawtthlerte chu hmei­chhiate tan a him lo fo a, hmeichhiate tan chauh ni lo, mipate tan pawh zan lamah khawpui khawthler a him theih nan hmeichhiain auchhuahpui se, tiin kawngzawh huaihawt a ni. MSCW chuan, Power Walk a hlawhtlin theih nana kawngzawh phalna petu Aizawl DC, venhimna petu Aizawl SP leh Traffic SP-te chungah leh, kawngzawhnaa tel zawng zawngte chungah an lawm hle tih an tarlang.