CM-in SEDP sem dan tur House a hrilh Jal Shakti Minister sum min pek tur a tam lutuk a, ka ringhlel - CM Zorama

Chief minister Zoramthanga chuan, SEDP an sem ngei tur thu February 25, Thawhlehni khan Assembly House-ah a sawi a, "A sem chu kan sem dawn khawp," tiin, sem dan tur a sawifiah. CM chuan, Jal Shakti minister Gajendra Singh Shekhawat-a'n sum tam tak pek a tum thu a rawn hrilh tih sawiin, pawisa chu a tam êm avangin a rinhlelh hial thu a sawi.

ZPM member Vanlalhlana'n, "Cheng nuai thum kan sem ang. NLUP hmu tawhte pawhin in hmu vek ang, tih kha kan hriat dan a ni a, sorkar hian an sem dawn lo a nih chuanin, kan sem dawn lo tih chiang takin sawi se'ngin, chaw fûn tih vel kha tibuai lem loin chiang takin sawi mai se," tiin House-ah a sawi a; SEDP chungchang chu Chief Minister-in a sawifiah a ni.

CM Zoramthanga chuan, "A sem chu kan sem dawn khawp. Amaherawhchu, nuai thum heti hian a chaw fûn ringawta pek ni loin, ka sawi a chu; tunah pawh khutah kan han en chhin ta a. A vah nan eng zat nge an mamawh chu chu kan pe a ni. Ti khan kan pe chho zel," a ti. Sorkar hnathawk pawhin an tih theih chuan tihtir an tum thu sawiin, "Nakinah sorkar hna aṭangin an lo pension ang a, an firm-a kha maintain tur an mamawh dawn a ni. Chuvangin, tih vek kan tum," a ti.

SEDP an kalpui dan tur sawiin CM Zorama chuan, "Hotute'na kan sawi chu, hei hi nuai thum kan han sawi ṭhin a, nuai thum aia tlem pawh a awm ang, nuai thum aia tam pawh a awm ang. Hna thawhna turin a lo buatsaihna tur nen, tin, hetah a chaw fûn tur nen, kha'ng zawng zawng atan khan kan kalpui dawn. Amaherawhchu, feh chhuahpui tur lo, chaw fûn ei tur ringawta kha chu pek kan tum lo. Chuvangin, kha mia kha kan kalpui tum dan chu a ni," a ti.

Chief minister chuan, sorkar laipuia project an theh thlak chu an lo pawmpui mek thu sawiin, "Budget ka present hnua tuna kan project min pek ringawt pawh tun ni thum ni li chhung âwrh hian, hei hi Social Welfare & Tribals-ah hian vbc. 107 min rawn pe a. Tourism-ah hian vbc. 1,000 min rawn pe a, Sports-ah hian vbc. 1,250 min pe a. Tichuan, UDPA-ah hian vbc. 1,800 vel a ni ang. Khati bâwr pali ringawt pawh kha vbc. 4,000 aia tam hi tun hnaiah khan kan hmu," a ti.

Jal Shakti minister Shekhawat-a'n sum tam tham tak a pek tur thu House hrilhin Zoramthanga chuan, "Jal Shakti minister Shekhawat-a pawh khan mimal takin min rawn phone a, 'Hei in project kha ka hmu a, tam deuh ka rawn pe dawn che u a ni,' a ti a. Vawiinah hian ka sawi duh loh chu, a rawn sawi amount kha a tam lutuk a, ka ringhlel a, chuvangin, amount-a ka chian loh chuan ka sawi ngam bik lo. Tin, a dang pawh a awm ṭeuh mai," a ti.

Finance minister ni bawk Zoramthanga chuan, "Tun chawlhkar khat chhunga Central aṭanga hemi project base-a pawisa kan hmuh ringawt hi vbc. 5,000 chu a tling hrim hrim. Chuvangin, a lo kal dawn chauh a ni," tiin pawisa a tam tur thu a sawi.