KHAWTHLIR

Directorate of Science & Technology hnuaia Mizoram Science, Technology & Innovation Council (MISTIC) chuan nimin khan Synod Conference Hall-ah ‘National Science Day’ an hmang a, minister Lalchamliana'n a hmanpui. National Science Day hi February 28, 2021 a ni a, Pathianni a nih avangin nimin khan hman a ni. Kumina thupui chu 'Future of Science,  Technology & Innovation: Impacts on Education, Skills and Work' tih a ni.

State Referral Hospital-ah nimin khan Covid-19 vei mi pakhat dah luh a ni a, ani nen hripui vei vangin SRH-ah mi 14 enkawl mek an ni. SRH-ZMC Bulletin tarlan danin, mi 14 zinga pahnih chu ICU-ah awmin, oxygen nen enkawl ve ve an ni a; Isolation ward-ah mi 12 awmin, harsatna lian tham an nei lo. Mi 14 zingah hian kum 60 chung lam pahnih leh naupang kum 14 hnuai lam pathum an tel a ni.

Mamit District Child Protection Committee chu nimin khan DC conference hall-ah an ṭhu a, kum 2020-21 chhunga an hnathawhte an thlirlêt. Meeting-a tarlan danin, Mamit DCPU hnuaiah hian child care institutions pali a awm a, naupang pali hnenah Foster Care pek niin, naupang 39 chu thla tin sponsorship Rs. 2,000 pek an ni. Kum 2020-21 chhungin Child Welfare Committee hnuaiah case 24 a awm a, Juvenile Justice Board hnuaiah case 21 a awm bawk.

Nimin khan ZMC Covid-19 Laboratory-ah RT-PCR hmangin mi 28-te swab sample endik a ni a, result chu vawiin zingah tihchhuah a ni ang. Nimina sample endik chu February 28 leh March 1-a lakte a ni.

FCSCA department-in consumer-te tana e-newsletter ‘Consumer Virthli’ tih an buatsaih thar chu nimin khan FCSCA director Dr Lalhriatzuali Ralte-in a tlangzarh. e-Newsletter hi consumer-te dinhmun chawikan a nih theihna tura Consumer Welfare Fund aṭanga buatsaih a ni a; fcsca.mizoram.gov.in website aṭangin download theih a ni.