Doctor kum 60 aia upate hnenah Covid-19 vaccine pek ṭan a ni

Nimin khan Civil Hospital, Aizawl auditorium-ah doctor, kum 60 chung lamte hnenah Covid-19 laka invenna damdawi (vaccine) Covishield pek ṭan a ni a; a hawnna inkhawm tawi hman niin, Indian Medical Association (IMA), Mizoram president Dr Rosangluaia'n a hawng.

Doctor kum 60 chung lamte hnena Covid-19 vaccine pek ṭan ni-ah hian IMA member kum 60 chung lam mi 50 pek an ni a; inkhawm tawi buatsaihah Covid vaccine spokeperson Dr Lalzawmi'n thil pawimawhte a sawi. 

Hetih lai hian, February 26, 2021 thleng khan Covid-19 vaccine first dose chu healthcare worker 11,358 hnenah pek a ni tawh a, second dose pawh mi 5,659 hnenah pek a ni tawh. Frontline worker mi 10,639 hnenah first dose pek a ni tawh a, second dose erawh pek ṭan a la ni lo; second dose hi first dose lak aṭanga ni 28 hnuah lak tur a ni.

Vaccine hi nimin khan pek chhunzawm a ni a, pek zat erawh he thu ziah lai hian hriat hman a ni lo.

1.    COVID-19 vaccine lâk zawhah pawh Covid-19 laka invênna sorkarin a duan chu chhunzawm tur a ni.

2.    Lu ná, luakchhuak, khawsikte hi Covid vaccine lak zawha awm thei a ni a, ngaihṭhat loh tur a ni lo.

3.    Tun thlengin Covid vaccine lâk vangin damdawi-ina enkawl ngai an la awm lo a, hlauh tur a ni lo.

4.    Kum 60 chung lam leh natna benvawn nei kum 45-59 inkar mite chu March thla aṭangin vaccine pek ṭan a ni a, mipuite la ṭheuh tura sàwm an ni.